Efıopııada bolǵan jol apatynan 21 adam kóz jumdy
ASTANA. QazAqparat - Efıopııanyń soltústigindegi Tıgr provıntsııasynda avtobýs aýdarylyp qalyp, 21 adam qaıtys boldy. Sondaı-aq kóptegen adamdar jaraqat aldy. Bul týraly Sınhýa agenttigi habarlaıdy.
«Qazirgi tańda 21 adamnyń qurban bolǵany ǵana málim jáne kóptegen adamdar jaraqat aldy»,-delingen osy oqıǵaǵa qatysty taratylǵan baspasóz baıanynda.
Onda sondaı-aq zardap shekken barlyq adamdar aýrýhanaǵa jetkizilgendigi aıtylǵan.
Jol qozǵalysyn retteýshiniń aıtýynsha, avtobýstyń apatqa ushyraýy onyń shekten tys kóp adamdardy mingizip alýyna baılanysty bolýy múmkin. Jalpy talap boıynsha avtobýsqa 27-en artyq adam alýǵa bolmaıdy. Al avtobýs apatqa ushyraǵan ýaqytta onda 34 adam otyrǵan.
Osyǵan deıin ortalyqafrıkalyq memlekette bolǵan iri jol apatynan 78 adam qaıtys bolǵandyǵy jarııalanǵan. Adamdar mingen júk kóligi Bambarı qalasy mańynda tóńkerilip qalǵan.
