Efıopııada 46 adam qoqys kóshkininiń astynda qaldy
ASTANA. QazAqparat - Efıopııa astanasy Addıs-Abeba mańynda qoqys tastaıtyn orynnan kóshkin júrip, keminde 46 adam mert boldy. Bul týraly 12 naýryz kúni Associated Press habarlady dep jazady lenta.ru .
Agenttiktiń habarlaýynsha, qurban bolǵandardyń basym bóligi balalar men áıelder. Kóshkinniń astynda ondaǵan adamdar jatyr. Qaıǵyly jaǵdaı bolǵan jerde 150 adam bolǵan, olardyń 37-in arshyp aldy. Qutqarý jumystar áli júrip jatyr.
Qoqys betonnan salynǵan jáne ýaqytsha daıyndalǵan birneshe turǵyn úıdi basyp qaldy. Adamdar qoqystyń mańynda onda ómir súrý arzan bolǵan soń mekendep kelgen. Sonymen qatar onda qoqys jınap, nápaqasyn taýyp júrgen adamdar da turyp jatqan.
Kóshkinniń júrýine ne sebep bolǵany ázirge belgisiz. Belgilisi bul orynǵa qaladan 50 jyldan beri qoqys tastalyp kelgen. Sońǵy ýaqytta bul qaldyqty paıdalaný jumystary toqtatylǵan. Bılik ókilderi qazirgi osy mańda turyp jatqandardy kóshirýge kúsh salýda.
