Efıopııada 400 myńǵa jýyq adam sý tasqynynan zardap shekti

ASTANA. KAZINFORM – Efıopııada iri sý tasqyny men kóshkin saldarynan 400 myńǵa jýyq efıopııalyq zardap shekti, dep jazady TASS.

Tabıǵı apattardyń aldyn alý jáne azyq-túlik qaýipsizdigi jónindegi aımaqtyq komıssııanyń basshysy Tesfaý Batableniń aıtýynsha, apattan ásirese Amhara aımaǵy kóp zardap shekti.

Onyń aıtýynsha, sý tasqyny Amharanyń tabıǵı apat qaýpi bar 34 aýdanyna áser etti. Kóshkinder qazirdiń ózinde soltústik Gonder, Ońtústik Gonder jáne Vag Hemra aýdandarynda tirkelgen. Soltústik-Batys Tygraı aımaǵynyń Tselemtı aýdanyndaǵy taýlardyń biriniń baýraıynda keń kólemdi topyraq massasynyń jınalýy 10 adamnyń ómirin qıdy, shamamen 3 myń adam úılerinen ketýge májbúr boldy.

Amhara aımaǵynyń bıligi Tselemtı aýdanyndaǵy muqtaj jandarǵa 2 myń tonna gýmanıtarlyq kómek bóldi. Efıopııa Ulttyq meteorologııalyq agenttiginiń málimeti boıynsha, elde nóser jaýyn 10 qyrkúıekke deıin jalǵasady.

Batable onyń komıssııasy qaýip tónip turǵan 21 aýdanda aldyn-ala sý qoımalaryn salyp jatqanyn atap ótti. Eskertý sharasy retinde bılik turǵyndardy osy aýdandardan ketýge shaqyrady.

Nıgerııada birneshe aptaǵa sozylǵan sý tasqyny 170-ten astam adamnyń ómirin qıdy, 200 myńnan astamy ishki qonys aýdarýshylarǵa aınaldy.