Efıopııa azamattary Kenııa sotyna Meta kompanııasyna qatysty shaǵym túsirdi
ASTANA.QazAqparat - Efıopııanyń eki azamaty Meta kompanııasyna qarsy sotqa shaǵym túsirip, ony áleýmettik jelilerde dushpandyq pen óshpendilikti qozdyrdy, dep aıyptady, dep habarlaıdy QazAqparat Euronews-ke silteme jasap.
Shaǵymdanýshylardyń biriniń ákesi Facebook-te oǵan shabýyl jasaýǵa shaqyrǵan habarlamalar paıda bolǵan soń óltirilgen.
Ótinish afrıkalyq áleýmettik jeli kontentin moderatsııalaý ortalyǵy ornalasqan Kenııa sotyna berildi.
«Ol óziniń ákesin óltirýge shaqyrǵan jazbalardy kórgende, ol týraly Facebook-te jarııalady. Olar jaýap bergenshe, bir aıdan artyq ýaqyt ketti. Biraq Facebook jazbalardyń qaýymdastyq talaptaryn buzatynymen kelisip, olardy joıýǵa ýáde bergennen keıin de posttardyń birin bir jyldan keıin platformada kórýge bolatyn edi», - deıdi shaǵymdanýshylardyń múddesin qorǵaýshy advokat Mersı Mýtemı.
Shaǵymdanýshylar Meta óz platformasyndaǵy kontentke, atap aıtqanda Tygraıdaǵy qaqtyǵysqa qatysty durys jaýap bermedi dep sanaıdy. Olar sottan 200 mıllıard kenııalyq shıllıng (1,5 mıllıard eýrodan astam) ótemaqy qoryn qurýdy suraıdy, bul qarajat áleýmettik jelide paıda bolatyn óshpendilik qurbandaryn qoldaýǵa jumsalady.
Meta kompanııaǵa qarsy aryzǵa áli kópshilik aldynda jaýap bergen joq.
Foto: AFP
