Efes pen Coca-Cola Qazaqstanda 10 myńnan astam jumys ornyn qamtamasyz etedi
ASTANA. KAZINFORM — Premer-mınıstrdiń orynbasary — ulttyq ekonomıka mınıstri Serik Jumanǵarın Anadolu Group holdınginiń basqarma tóraǵasy Kamıl Súleıman ıAzydjımen kezdesý ótkizdi.
Kezdesýdi asha otyryp, ol ınvestorlardyń quqyǵyn qorǵaý, ekonomıkalyq saıasattyń turaqtylyǵy men boljamdylyǵy Qazaqstan Úkimetiniń ózgermeıtin basymdyǵy ekenin atap ótti. Vıtse-premer Anadolu Group kompanııasyna óńdeý ónerkásibi men tamaq ónerkásibin damytýǵa qosqan úlesi úshin alǵys aıtty.
— Qazaqstan halyqaralyq kompanııalarmen yntymaqtastyqty damytýǵa zor mán beredi. Memleket basshysynyń tapsyrmasy boıynsha úkimet qolaıly ınvestıtsııalyq ahýal qurý, ınvestorlardyń quqyǵyn qorǵaý jáne bıznesti júrgizý úshin turaqty jaǵdaıdy qamtamasyz etýde dáıekti túrde jumys istep jatyr, — dedi Serik Jumanǵarın.
Anadolu Group ókilderi kompanııa úshin Qazaqstan Túrkııadan keıingi ekinshi mańyzdy naryq ekenin atap ótti. Qazirgi ýaqytta jańa ınvestıtsııalyq joba júzege asyrylýda. Sondaı-aq, Eýrazııalyq ekonomıkalyq odaq pen Ortalyq Azııa elderine ónim jetkizý úshin Qazaqstanda eksporttyq hab qurý múmkindigi qarastyrylýda.
Taraptar alkogol óniminiń keıbir túrine qatysty aktsızdik saıasatty jetildirý, taýardy tsıfrlyq tańbalaý júıesin damytý jáne quramynda qanty bar sýsynǵa salyq engizý sekildi Qazaqstandaǵy óndiristerdi odan ári damytý máselelerin talqylady. Serik Jumanǵarın tsıfrlyq tańbalaýdy engizý merzimin aýystyrý týraly sheshim iri óndirýshilerdiń pikiri eskerile otyryp qabyldanǵanyn jáne olarǵa jańa talapqa ýaqtyly daıyndalýǵa ýaqyt beriletinin aıtty.
Taraptar qazaqstandyq kásiporyndardyń eksporttyq áleýetin keńeıtý perspektıvasyna da erekshe nazar aýdardy. Anadolu Group ókilderi syra ónimderin tek PET-qaptama formatynda joǵary suranysqa ıe elderge eksporttaý úshin shyǵarý múmkindigin qarastyrýdy usyndy. Vıtse-premer bul másele qazirdiń ózinde pysyqtalyp jatqanyn jetkizdi. Bul rette ulttyq zańnamanyń yqtımal ózgeristeri ónim tek syrtqy naryqqa arnalǵan jaǵdaıda ǵana qaralady.
Qazaqstanda quramynda qant bar sýsyndarǵa salyq engizý bastamasyn talqylaı otyryp, vıtse-premer bul másele Dúnıejúzilik densaýlyq saqtaý uıymynyń usynymyn eskere otyryp qaralatynyn jáne Densaýlyq saqtaýdy damytý tujyrymdamasy sheńberinde talqylaý satysynda turǵanyn atap ótti. Úkimet bul másele boıynsha bıznespen odan arǵy dıalogqa ashyq.
Kezdesý barysynda Serik Jumanǵarın otandyq qant salasyn damytý jobalaryn júzege asyrý týraly da aıtty. Atap aıtqanda, Jambyl oblysynda iri qant klasterin qurý oıda bar. Bul aldaǵy jyldary qant óndirisin edáýir ulǵaıtýǵa jáne óńdeýshi kásiporyndardy otandyq shıkizatpen qamtamasyz etýge múmkindik beredi.
Kezdesýdi qorytyndylaı kele, taraptar yntymaqtastyqty odan ári arttyrýǵa ózara múddeli ekenin rastady. Serik Jumanǵarın qazaqstandyq shaǵyn jáne orta bıznes kásiporyndaryn iri halyqaralyq ınvestorlardyń, onyń ishinde oraý, logıstıka jáne kólik salalaryndaǵy óndiristik tizbekke tartýdyń mańyzdylyǵyn atap ótip, Úkimettiń Anadolu Group-qa qoldanystaǵy jáne jańa ınvestıtsııalyq jobalardy júzege asyrýda qajetti járdem kórsetýge daıyn ekenin jetkizdi.
Anyqtama: Anadolu Group Qazaqstanda 1994 jyldan beri jumys isteıdi. Sýsyn óndirisi 1997 jyly iske qosylǵan. Búginde top «Efes Kazakhstan» JK AQ jáne «Koka-Kola Almaty Bottlers» BK JShS kásiporyndary atynan qyzmet etedi. Jumys kezeńinde el ekonomıkasyna shamamen $1 mlrd ınvestıtsııalanyp, bes óndiristik alań quryldy. 2013 jyldan beri 360 mlrd teńge salyq tólenip, 10 myńnan astam tikeleı jáne janama jumys orny ashylǵan.
Aıta ketelik Astana, Pavlodar jáne Túrkistan bos jumys oryndary boıynsha kósh bastap tur.
