EEO elderinen keletin 700 tonna sapasyz azyq-túlik ónimi keri qaıtaryldy
TARAZ. QazAqparat - Jambyl oblysynda azyq-túlik qaýipsizdigi boıynsha ótkizilgen úsh aılyqtyń nátıjeleri týraly aıtyldy, dep habarlaıdy «QazAqparat» HAA tilshisi.
Oblystyq qoǵamdyq densaýlyqty saqtaý departamentiniń basshysy Berik Jarqynbekovtyń málimetinshe, 2017 jyldyń qarashasynan 2018 jyldyń qańtaryna deıin azyq-túlik qaýipsizdigin baqylaý jáne monıtorıng jasaý is-sharalary ótken.
«Osyǵan sáıkes arnaıy jedel toptar qurylyp Eýrazııalyq ekonomıkalyq odaqqa múshe elderden ákelinetin taýarlarǵa zerthanalyq baqylaý jasaldy. Mamandar 4 410 avtokólikti tekserdi. Olardyń 2 880-i azyq-túlik, 678-i basqa ónimderdi tasyǵan. Tekseris qorytyndylary kórsetkendeı qujatsyz kelgen 554 119 keli jemis jáne keptirilgen jemis, kókónis ónimderi, 60 215 keli jarma ónimderi, 58 100 keli kondıter, 7 148 keli et jáne 16 583 keli basqa da ónimder keri qaıtaryldy»,-dedi spıker.
Berik Jarqynbekovtyń aıtýynsha, barlyǵy, 700 tonna azyq-túlik ónimi keri qaıtarylǵan.
