EEK Reseıdiń Qazaqstan qyzanaǵy men buryshyn kirgizýge qoıǵan shekteýin zańsyz dep tanydy

NUR-SULTAN. QazAqparat – Eýrazııalyq ekonomıkalyq komıssııa Qazaqstannan Reseı aýmaǵyna kiretin qyzanaq pen buryshqa qoıylǵan shekteýdi zańsyz dep tanydy, dep habarlaıdy QazAqparat.

Bul týraly Saýda jáne ıntegratsııa mınıstrliginiń resmı saıty habarlap otyr.

«2021 jylǵy 16 naýryzda Qazaqstan tarapynyń bastamasy boıynsha Eýrazııalyq ekonomıkalyq komıssııa alqasy Qazaqstannan ákelinetin qyzanaq pen buryshqa Reseıdiń tyıym salýy qanshalyqty zańdy degen máseleni qarady. Alqa músheleri men ókilderdiń pikirsaıys qorytyndysy boıynsha EEK Alqasy ótken jyldyń sońynda «Rosselhoznadzor» mekemesi belgilegen tyıymdy zańsyz jáne kedergi dep taný týraly sheshim qabyldady», - dep jazylǵan resmı málimette.

Endi Reseı tarapy EEK Alqasynyń qabyldaǵan sheshimi boıynsha belgilengen tyıymdardy bir aıdyń ishinde joıýy kerek.

Eske salsaq, 2020 jyldyń 16 jeltoqsanynan bastap «Rosselhoznadzor» Pavlodar oblysynan qyzanaq pen burysh ákelýge, al 2021 jyldyń 18 qańtarynan bastap Aqtóbe jáne Almaty oblystarynan qyzanaq ákelýge tyıym salǵan bolatyn. Bul sheshimin qazaqstandyq ónimderde qyzanaqtyń «qońyr ájim» vırýsy (Tomato brown rugose fruit virus) bolýy múmkin degen ýájben baılanystyrǵan edi.

Saýda jáne ıntegratsııa mınıstri Baqyt Sultanovtyń málimeti boıynsha, atalmysh tyıym salynǵan sátten bastap qazaqstandyq kásiporyndar 200 mln teńgeden asatyn tabystan qaǵylǵan.

«EEK alqasy bizdiń dálelderimizdi estidi jáne Reseı bıliginiń áreketterin tosqaýyl dep tanydy» - dedi Baqyt Sultanov.