EEK: Reseıde shetelden tasymaldanatyn taýarlarǵa baj salyǵy tómendetiledi

MÁSKEÝ. QazAqparat - Eýrazııalyq ekonomıkalyq komıssııa Reseıdiń DSU-ǵa qatysý mindettemelerin oryndaý boıynsha shetelden tasymaldanatyn taýarlarǵa kedendik baj salyǵynyń mólsherlemesin kezekti tómendetýdi bekitti.

EEK habarlaǵandaı, kóptegen taýarlarǵa qatysty jańa baj mólsherlemesi 2014 jylǵy 1 qyrkúıekten bastap kúshine enedi.

«Bıylǵy jyly shamamen barlyǵy 4800 taýarǵa baj salyǵy tómendetiledi, alaıda olardyń kópshiligine shamamen 1-3 paıyz sheginde ǵana azaıtylady. Bul rette 1068 pozıtsııa úshin reseılik mindettemelerge sáıkes baj salyǵyn sońǵy ret azaıtý bolyp tabylady. Aldyn ala esepteýlerimiz boıynsha, sonyń nátıjesinde ortasha salmaqtalǵan tarıf mólsheri 7,8 paıyzdan 7,1 paıyzǵa deıin tómendeıdi», - dedi EEK saýda mınıstri Andreı Slepnev.