EEK Keńesinde kedendik jáne tehnıkalyq retteý máseleleri talqylandy

EREVAN. QazAqparat - QR Premer-Mınıstriniń birinshi orynbasary-Qarjy mınıstri Álıhan Smaıylov Armenııanyń Erevan qalasynda ótken Eýrazııalyq ekonomıkalyq komıssııa (EEK) Keńesiniń kezekti otyrysyna qatysty, dep habarlaıdy QazAqparat.

«EEK Keńesiniń músheleri ishki naryqtardyń jumys isteýi, halyqaralyq yntymaqtastyq, kedendik jáne tehnıkalyq retteý, Eýrazııalyq ekonomıkalyq odaqtyń (EAEO) sandyq kún tártibi, sanıtarlyq jáne fıtosanıtarlyq sharalardy qoldaný máselelerin talqylady.

Eýrazııalyq ekonomıkalyq komıssııanyń taýarlar men qyzmetterdiń biryńǵaı naryǵyn qurýǵa kedergi keltiretin EAEO ishki naryǵyndaǵy shekteýler men kedergilerdi joıý boıynsha jumystardyń barysy týraly aqparaty tyńdaldy», - delingen QR Qarjy mınıstrligi taratqan habarlamada.

Málim etilgendeı, EAEO sandyq kún tártibin iske asyrý sheńberinde EAEO jáne EEK múshe memleketterdiń quzyrettilik ortalyqtarynyń ózara is-qımyl tártibi maquldandy.

«Eýrazııalyq úkimetaralyq keńestiń kezekti otyrysynyń kún tártibi bekitildi. Ony bıylǵy 25 qazanda Máskeý qalasynda ótkizý josparlanyp otyr. EEK Keńesi orta merzimdi perspektıvaǵa EAEO negizgi seriktesterimen saýda-ekonomıkalyq yntymaqtastyqty damytý joldaryn anyqtaıtyn qujatty daıyndaýdy tapsyrdy. Shıkizat pen qosalqy bólshekterdiń jekelegen túrlerine ımporttyq keden bajyn ýaqytsha tómendetý boıynsha birqatar sheshimder qabyldandy», - dedi mınıstrlikten.