EEK Keńesi Qazaqstannyń qurylysqa baılanysty tehnıkalyq reglament ázirleý usynysyn maquldady

NUR-SULTAN. QazAqparat - B 22-23 sáýirde beınekópir rejıminde QR Premer-Mınıstriniń birinshi orynbasary Á. Smaıylovtyń tóraǵalyǵymen Eýrazııalyq ekonomıkalyq komıssııa Keńesiniń (Keńes) kezekti otyrysy ótti, dep habarlaıdy QazAqparat primeminister.kz-ke silteme jasap.

EEK Keńesiniń músheleri EAEO-ǵa múshe memleketterdiń saýda-ekonomıkalyq yntymaqtastyǵy, kedendik jáne tehnıkalyq retteý, halyqaralyq yntymaqtastyq, EAEO-nyń tsıfrlyq kún tártibi, sanıtarııalyq jáne fıtosanıtarııalyq sharalar, energetıka jáne EAEO-nyń ishki naryqtarynyń jumys isteýi jónindegi máselelerdi qarady. Atap aıtqanda, EAEO aýdıtorlyq qyzmetteriniń biryńǵaı naryǵyn qalyptastyrý maqsatynda EAEO sheńberinde aýdıtorlyq qyzmetti júzege asyrý týraly Kelisim jobasy maquldandy. Kelisim jobasy múshe memleketterdiń tulǵalaryna aýdıtorlyq qyzmetterdi shekteýsiz jáne alyp tastaýlarsyz jetkizý jáne alý quqyǵyn berýdi kózdeıdi, múshe memleketterde aýdıtorlyq qyzmetti júzege asyrý men retteýdiń biryńǵaı tásilderin aıqyndaıdy. EAEO-ǵa qatysýshylardyń barlyǵy aǵymdaǵy ekonomıkalyq daǵdarystyń saldaryn tezirek eńserýi jáne ekonomıkanyń ozyńqy damý traektorııasyna shyǵýy maqsatynda EAEO-ǵa múshe memleketterdiń 2021-2022 jyldarǵa arnalǵan makroekonomıkalyq saıasatynyń negizgi baǵdarlary maquldandy. Qoıylǵan maqsattarǵa qol jetkizýdiń birinshi kezektegi baǵyttary makroekonomıkalyq turaqtylyq jáne kásipkerlik belsendilikti qalpyna keltirý, ınvestıtsııalar kólemin ulǵaıtý jáne t.b. úshin qolaıly jaǵdaılar qalyptastyrý bolýǵa tıis. EEK Keńesiniń músheleri ónerkásip salasyn, atap aıtqanda, bólingen energetıkany, elektr energııasyn tutyný ornyna tikeleı jaqyn jerde derbes óndirýge qabiletti jańartylatyn energııa kózderi obektilerin damytýǵa yqpal etetin memleketaralyq baǵdarlama jobasyn ázirleýge bastama berdi. Іshki naryqtaǵy qant baǵasyn turaqtandyrý maqsatynda EEK Keńesi 2021 jylǵy 15 mamyrdan 30 qyrkúıekke deıingi kezeńde qantty bajsyz ákelýge kvota bekitti, Qazaqstan úshin kvota mólsheri 134,4 myń tonnany quraıdy. Bul ishki naryqtaǵy qant tapshylyǵyn boldyrmaýǵa, qant baǵasynyń deńgeıin turaqtandyrýǵa múmkindik beredi. Sonymen qatar, Qazaqstan men Belarýs taraptary taraptardyń ýákiletti organdaryna aldaǵy aılarda Qazaqstanǵa qant jetkizý máselesin pysyqtaýdy tapsyrdy. EEK Keńesi «Qurylys materıaldary men buıymdarynyń qaýipsizdigi týraly» bólek tehnıkalyq reglamentti ázirleý týraly Qazaqstannyń bastamashyl usynysyn maquldady. Bul usynys, birinshi kezekte, óndirilgen qurylys ónimderiniń (materıaldar men buıymdardyń) EAEO kedendik aýmaǵy boıynsha kedergisiz oryn aýystyrýyn qamtamasyz etýge baǵyttalǵan. EEK Keńesiniń músheleri EAEO sheńberinde temeki jáne alkogol ónimderine tańbalaýdy engizýdiń orynsyzdyǵy týraly sheshim qabyldady. Mundaı sheshim osy taýarlardyń óndirisi men aınalymynyń erekshelikterine, sonyń ishinde olarǵa aktsızder mólsherleriniń aıyrmashylyǵyna baılanysty. Koronavırýs ınfektsııasynyń taralýyna qarsy kúresý úshin EEK Keńesi birqatar taýarlardy bajsyz ákelý merzimin 2022 jylǵy 30 maýsymǵa deıin uzartý týraly sheshim qabyldady. Atalǵan tizbege dárilik zattar, jeke qorǵanysh quraldary, sondaı-aq olardy óndirýge arnalǵan shıkizat, vaktsınalar, medıtsınalyq apparattar jáne medıtsınalyq maqsattaǵy ózge de taýarlar engizilgen. EEK Keńesiniń otyrysy syndarly túrde jáne ózara túsinistik jaǵdaıynda ótti. Qaralǵan barlyq máseleler boıynsha ózara tıimdi sheshimder qabyldandy, olar EAEO sheńberinde ıntegratsııalyq protsesterdi odan ári damytýǵa baǵyttalǵan. Kún tártibiniń jekelegen máselelerin taraptar aǵymdaǵy jyldyń mamyr aıyna josparlanǵan Keńestiń kezekti otyrysynda qaraýǵa kelisti.