EEK Keńesi Qazaqstan bastamasymen janarmaı ımportyn baj salyǵynan bosatty
ASTANA. KAZINFORM — Onlaın formatta Eýrazııalyq ekonomıkalyq komıssııa Keńesiniń otyrysy ótti. Qazaqstan delegatsııasyn Premer-mınıstrdiń orynbasary – Ulttyq ekonomıka mınıstri Serik Jumanǵarın basqardy. Otyrys qorytyndysy boıynsha qazaqstandyq tarap usynǵan negizgi bastamalar qoldaý tapty. Bul týraly Úkimettiń baspasóz qyzmeti habarlady.
Keńes 2026 jylǵy 1 aqpannan bastap EAEO aıasynda orman materıaldarynyń jekelegen túrlerin tasymaldaý kezinde navıgatsııalyq plombalardy qoldaný jónindegi pılottyq jobany iske qosýdy maquldady. Bul sheshim Belarýs pen Reseıden Qazaqstan men Qyrǵyzstanǵa orman ónimderin tasymaldaýda kólik quraldaryn tirkeý qajettigi jónindegi burynnan kóterilip júrgen máseleni sheshýge múmkindik berdi.
Endi tasymaldanatyn júkterdi navıgatsııalyq plombalar arqyly baqylaýǵa bolady. Bul óz kezeginde orman ónimderin Qazaqstanǵa qaıta óńdeýge tasymaldaý tártibin jeńildetip, baqylaý mehanızmin tıimdi etedi. Navıgatsııalyq plombalar bóshke jasaýǵa arnalǵan aǵash, temirjol jáne tramvaı shpaldary sekildi materıaldardy tasymaldaýda qoldanylady.
Sondaı-aq Qazaqstannan EAEO elderine eksporttalatyn taýarlardyń shyqqan elin rastaıtyn serııalyq sertıfıkattardy qoldaný merzimi uzartyldy. Bul sheshim kásipkerlerge ár jóneltý saıyn jeke sertıfıkat rásimdemeı, alty aıǵa jaramdy bir ǵana sertıfıkatpen jumys isteýge múmkindik beredi. Mundaı tásil bıznestiń ákimshilik júktemesin azaıtyp, Odaqqa múshe elder arasyndaǵy saýda-sattyqty jeńildetedi.
Sonymen qatar Qazaqstan Respýblıkasyna 2030 jylǵy 31 jeltoqsanǵa deıin shuǵyl qyzmetterdi shaqyrý júıesi (qaýipsizdik túımeleri) joq kólik quraldaryn tirkeýge, sondaı-aq resmı dılerler ulttyq zańnamaǵa sáıkes ákeletin avtokólikterdi 2028 jylǵy 31 jeltoqsanǵa deıin aınalymǵa engizýge ruqsat berildi.
EEK Keńesi avıatsııalyq kerosın, dızel otyny men benzınge qatysty kedendik ákelý bajynan bosatý túrindegi tarıftik jeńildikti engizýdi qoldady. Qazirgi ýaqytta úshinshi elderden janarmaı ımporttaǵanda 5% kedendik baj salyǵy qoldanylady. Alaıda Qazaqstan ishki naryǵynda avıaotyn tapshylyǵy saqtalyp otyr. 2025 jylǵy suranys shamamen 1,2 mln tonna. Al otandyq óndiris bul kólemdi tolyq qamtamasyz ete almaıdy, tapshylyq shamamen 233 myń tonna.
Osy oraıda Qazaqstanda tranzıttik áýe júk tasymalyn damytý baǵdarlamasy qarqyndy júzege asyrylyp jatyr. Sonymen qatar 2026–2030 jyldar aralyǵynda júzege asyrylatyn munaı óńdeý zaýyttarynyń qýatyn arttyrý jobalary arqyly avıaotyn óndirisi jylyna 1,4 mln tonnaǵa deıin jetkizilmek.
Otyrys barysynda syrtqy saýdany retteý, tehnıkalyq retteý, sanıtarııalyq jáne fıtosanıtarııalyq sharalardy qoldaný, sondaı-aq EAEO-nyń jumys isteýine qatysty birqatar mańyzdy másele qaraldy.
Aıta keteıik, Túrkııa birqatar amerıkalyq taýarlarǵa qosymsha baj salyǵyn alyp tastady.