EEK Qazaqstanda ınflıatsııa deńgeıin tómendetýge baǵyttalǵan usynymdary ázirledi
ASTANA. QazAqparat - Eýrazııalyq ekonomıkalyq komıssııanyń alqasy «Eýrazııalyq ekonomıkalyq komıssııanyń Qazaqstan Respýblıkasynda ınflıatsııa deńgeıin (tutyný baǵalarynyń ındeksin) tómendetýge baǵyttalǵan sharalar boıynsha usynystary týraly» usynymdardy (budan ári - Usynymdar) ázirlep, qabyldady, dep habarlaıdy QR Ulttyq bankiniń baspasóz qyzmeti.
Eýrazııalyq ekonomıkalyq komıssııasy (budan ári - EEK) usynymdardy Qazaqstannyń Eýrazııalyq ekonomıkalyq odaq týraly shartta belgilengen jáne Eýrazııalyq ekonomıkalyq odaǵynyń (budan ári - EAEO) múshe memleketter arasyndaǵy osy kórsetkishtiń eń tómengi máni eskerile otyryp aıqyndalatyn ınflıatsııa deńgeıi kórsetkishiniń sandyq máninen asyp ketýine baılanysty ázirledi.
Ekonomıkalyq damýdyń ornyqtylyǵyn aıqyndaıtyn makroekonomıkalyq kórsetkishterdiń sandyq mánderinen jekelegen múshe memleketterdiń 2012-2015 jyldary asyp ketýine qaramastan, bul EAEO makroekonomıkalyq turaqtylyqty qamtamasyz etý maqsatynda EEK daıyndaǵan ekinshi qujat ǵana. Osylaısha, EAEO múshe memleketterdiń ekonomıkalyq ornyqtylyǵyn aıqyndaıtyn makroekonomıkalyq kórsetkishterdiń sandyq mánderinen asqan jaǵdaıda Usynymdar ázirleýdiń oryndylyǵyn aıqyndaýǵa EEK tarapynan irikteý tásiliniń qoldanylǵanyn baıqaýǵa bolady.
Tutastaı alǵanda EEK-tiń Qazaqstan úshin usynymdary júrgizilip otyrǵan aqsha-kredıt saıasatyna qaıshy kelmeıdi jáne EEK ókilderiniń Qazaqstannyń ýákiletti organdarymen, onyń ishinde Ulttyq Bankpen ekijaqty konsýltatsııalar barysynda birlesip ázirlendi. Atap aıtqanda, Usynymdar ınflıatsııalyq targetteý rejimin qoldanýdy, aqsha-kredıt saıasatynyń transparenttiligin arttyrýdy, ınflıatsııa boıynsha ulttyq nysanaly baǵdarǵa qol jetkizýdi qamtamasyz etýdi kózdeıdi.
