EEK Alqasynyń jańa tóraǵasy 2020 jyldyń 1 aqpanynda qyzmetine kirisedi

SANKT-PETERBÝRG. QazAqparat – 2020 jyldyń 1 aqpanynan bastap Tıgran Sarkısıannyń ornyna EEK Alqasynyń tóraǵasy retinde Belarýs ókili Mıhaıl Mıasnıkovıch qyzmet atqaratyn bolady, dep habarlaıdy QazAqparat menshikti tilshisi.

RF prezıdenti Vladımır Pýtın jıyn barysynda taraptardyń aldaǵy bes jylǵa arnalǵan EAEO sheńberindegi ortaq damý strategııasyn keliskenin, alaıda bul jumystyń ári qaraı jalǵasatynyn atap ótti.

Sondaı-aq, Reseı Federatsııasynyń basshysy EEK Alqasynyń jańa tóraǵasyna EAEO múshe memleketterdiń barlyq astanalaryna jeke barýdy, EAEO múshe elderiniń sarapshylarymen jáne úkimet basshylarymen kezdesýler ótkizýin surady.

«Mundaı jumys paıdaly bolar edi. Ol ózi úshin de qandaı máselelerdi qosymsha úılestirý keregin naqtylap, bizdi de osy strategııa boıynsha túpkilikti sheshim qabyldaýǵa baǵyttalýymyz úshin aqparat berip otyrar edi», - dedi ol.

EEK Alqasynyń jańadan taǵaıyndalǵan tóraǵasy Mıhaıl Mıasnıkovıch óz sózinde qyzmetindegi negizgi mindetterge birlestikke múshe elderdiń tolyq ıntegratsııasy jáne EAEO negizgi qujattarynda belgilengen mindetterdi júzege asyrý úshin odan ári kúsh salý jatatyn atap ótti.

«Meniń oıymsha, biz ınfraqurylymnyń ortaq jobalaryn qurýda, tehnıkalyq retteýmen baılanysty máselelerde jáne memleketterimizdiń ekonomıkalary úshin birdeı bolýy qajet máselelerde shyndap iske kirisýimiz kerek. Sondaı-aq, ulttyq ınstıtýtymyzdy almastyrmastan, osy qurylymdardy tolyqtyrýymyz qajet. Birlesken iri kompanııalardy, ásirese jańa tehnologııalar salasynda jumys isteıtin kompanııalardy qurýymyz shart», - dep túıindedi ol.

Avtor: Narymbek Ismagýlov