EEF-2026: Memleket basshylary elordadaǵy forýmǵa qatysyp jatyr
ASTANA. KAZINFORM – Búgin elordada Memleket basshysy Qasym-Jomart Toqaevtyń qatysýymen V Eýrazııalyq ekonomıkalyq forýmnyń (EEF-2026) plenarlyq otyrysy bastaldy.
Bul jıynǵa Reseı Prezıdenti Vladımır Pýtın, Qyrǵyzstan Prezıdenti Sadyr Japarov, Belarýs Prezıdenti Aleksandr Lýkashenko, Armenııa vıtse-premeri Mger Grıgorıan, Kýba Respýblıkasynyń vıtse-prezıdenti Salvador Valdes Mesa, Vetnam Premer-mınıstriniń orynbasary Ho Kýok Zýng, Mońǵolııa Premer-mınıstriniń orynbasary Nıamtaıshıryn Nomtoıbaıar, Eýrazııalyq ekonomıkalyq komıssııa alqasynyń tóraǵasy Baqytjan Saǵyntaev jáne taǵy da basqa laýazymdy resmı tulǵalar keldi.
Astanadaǵy Kongress ortalyǵynda ótip jatqan bul forýmdaǵy basty taqyryp – «Jahandyq tsıfrlyq básekedegi EAEO: jasandy ıntellektige basymdyq berý». EEF-2026 baǵdarlamasy shamamen 30 is-sharadan turady jáne 4 taqyryptyq blokqa toptastyrylǵan: «EAEO naryǵyn damytýdy transformatsııalaý», «Eýrazııalyq sabaqtastyq», «EAEO+» jáne «Forým aıasyndaǵy is-sharalar».
EAEO-ǵa múshe memleketter basshylarynyń qatysýymen ótetin plenarlyq otyrys forýmnyń basty is-sharasyna aınalyp otyr.
Іs-shara EAEO múshe memleketter men úshinshi elderdiń iri, orta jáne shaǵyn bıznes basshylaryna, memlekettik bılik organdary men halyqaralyq uıymdar ókilderine arnalǵan.
Eske salsaq, birinshi EEF 2022 jylǵy mamyrda Bishkekte, ekinshi forým 2023 jyly Máskeýde, úshinshisi - 2024 jylǵy qyrkúıekte Erevanda, tórtinshisi 2025 jylǵy maýsymda Mınskide ótti. Al V EEF bıyl 28-29 mamyrda Astanada uıymdastyryldy.
Budan buryn habarlanǵandaı, búgin elordada Memleket basshysy Qasym-Jomart Toqaev pen Reseı Prezıdenti Vladımır Pýtın «Qazaqstan men Reseı halyqtarynyń dostyǵy men tatý kórshiliginiń jeti negizi týraly» birlesken málimdemege qol qoıdy.
