EEAO aıasyndaǵy yntymaqtastyq áleýetin kezeń-kezeńmen júzege asyrý qajet - Toqaev
«Bizdiń kezdesýimiz saıası jáne ekonomıkalyq qubylmalyq artqan erekshe jaǵdaıda ótip jatyr. Pandemııamen jáne geosaıası shıelenistiń artýymen baılanysty jahandyq kúızelis jańa naqtylyqqa alyp keldi. Jahandanýdyń ornyna barlyq qundylyǵymen jáne tabıǵı kemshilikterimen aımaqtandyrý dáýiri keldi. Qalaı bolǵanda da dástúrli ekonomıkalyq modelder men saýda baǵdarlarynyń qaıta formattalý protsesi jedeldeı tústi. Álem qarqyndy túrde ózgerip jatyr. Ókinishke oraı, kóp jaǵdaıda jaqsy jaǵyna qaraı emes. Kóptegen eldegi ınflıatsııa ondaǵan jyldyq rekordqa jetip, álemdik ekonomıka ósiminiń qarqyny baıaýlaýda. Investıtsııa men resýrstarǵa básekelestik ótkirlene tústi», - dedi Memleket basshysy.
QR Prezıdentiniń atap ótýinshe, ekonomıkalyq ósimniń tejeýshi faktory klımattyń ózgerýi, mıgratsııalyq aǵynnyń artýy, tehnologııalyq ózgeristerdiń jedeldeýi bolyp tur. Bul protsesterdiń bári nazarymyzdan tysqary ótip jatqan joq. Jańa shyndyq jaǵdaıynda álemdik tártiptiń qarqyndy ózgerip jatqan qurylymyn qaperde ustaǵan jón.
«Bizdiń óńirdiń elderi osy qaterlerdiń bárine durys jaýap taýyp qoımaı odan barynsha paıda kórý mańyzdy. Sondyqtan bizge Eýrazııalyq ekonomıkalyq odaq aıasyndaǵy yntymaqtastyqtyń barlyq áleýetin kezeń-kezeńmen júzege asyrý qajet. Eýarzııalyq ıntegratsııany qytaılyq «bir beldeý, bir jol» tujyrymdamasymen túıindestirý ózekti mindet», - dedi Qasym-Jomart Toqaev.