Edvard Snoýden Reseıde jumysqa ornalasty
ASTANA. 1 qarasha. QazAqparat - AQSh arnaıy qyzmetteriniń jumysyn áshkerelegen Ortalyq barlaý basqarmasynyń burynǵy qyzmetkeri Edvard Snoýden Reseıde jumysqa ornalasty. Bul týraly Amerıka azamatyna zańgerlik qoldaý kórsetýshi advokat Anatolıı Kýcherena habarlady.
Kýcherena Snoýdenniń naqty qaı jerge jumysqa ornalasqany týraly aıtqan joq, tek jumysy reseılik iri saıtqa qatysty ekenin sóz etti.
«Edvard qarashadan bastap jumysqa shyǵady. Ol iri reseılik saıttyń jumysyn qoldaýmen aınalysatyn bolady. Resýrstyń qalaı atalatynyn qaýipsizdik maqsatynda habarlaı almaımyn», - dep «RIA «Novostı» Kýcherenanyń sózin keltiredi. Advokattyń aıtýynsha, Snoýden jumysqa 2013 jylǵy 1 qarashadan bastap shyǵady.
