«EduBridge»: Pavlodarda volonterlik qozǵalysqa arnalǵan halyqaralyq forým ótti
PAVLODAR. KAZINFORM — Óńirdiń qoǵamdyq-saıası jáne áleýmettik tynysyn aıshyqtaǵan bul alqaly jıynǵa kórshiles Ózbekstan, Qyrǵyzstan, Belarýs jáne Ázerbaıjan memleketterinen, sondaı-aq Astana qalasy men Qaraǵandy, Aqmola, Shyǵys Qazaqstan, Abaı, Pavlodar oblystarynan ókilder arnaıy qatysty.
Pavlodarda ınklıýzıvti bilim berý men volonterlik qozǵalysty damytýǵa arnalǵan «EduBridge: Global Volunteer Forum for Inclusive Learning» atty aýqymdy halyqaralyq forým ótti. Forýmda volonterlik salany jańa sapalyq deńgeıge kóterý, ınklıýzııa mádenıetin qalyptastyrý jáne halyqaralyq seriktestikti nyǵaıtý máseleleri keńinen talqylandy.
Forýmnyń plenarlyq sessııasynda sóz sóılegen Pavlodar oblysy ákiminiń orynbasary Aıgúl Malıkova Ertis-Baıan óńirindegi eriktiler qozǵalysynyń ósip-órkendeý qarqynyna toqtaldy. Aıtýynsha, búginde jergilikti volonterler memlekettik qurylymdarmen, úkimettik emes uıymdarmen, qoǵamdyq birlestiktermen jáne bıznes ókilderimen tyǵyz dıalog ornatqan. Bul óz kezeginde áleýmettik mańyzy bar bastamalardy jedel ári tıimdi júzege asyrýǵa múmkindik berip otyr.
— Erikti bolý — jaı ǵana hobbı emes, bul — belsendi azamattyq ustanymnyń kórinisi. Volonterler ózderiniń kúndelikti ıgi isteri arqyly el Konstıtýtsııasynda aıqyndalǵan qundylyqtardy ómirde shynaıy júzege asyryp keledi. Olar muqtaj jandarǵa meıirim qolyn sozyp, qorshaǵan ortany qorǵaýǵa úles qosýda. Ózara kómek pen yntymaqtastyq mádenıetin nyǵaıtýda eriktilerdiń atqaratyn róli orasan zor, — dep atap ótti oblys ákiminiń orynbasary.
Óńirdegi volonterlik qozǵalystyń basty qozǵaýshy kúshi — jastar. Osy oraıda Pavlodar oblystyq stýdenttik qurylys jáne jastar jasaqtarynyń «Jasyl el» shtaby aýqymdy jobalardy eńserip keledi. Shtab qyzmeti tek qorshaǵan ortany kórkeıtýmen shektelmeı, ýaqytsha jumyssyz júrgen nemese oqý oryndaryna túspegen (NEET sanatyndaǵy) jastardy áleýmettik ortaǵa beıimdeýge baǵyttalǵan. Osyndaı bastamalardyń arqasynda júzdegen jas óren alǵashqy eńbek tájirıbesin jınaqtap, patrıottyq jáne ekologııalyq aktsııalarǵa belsene aralasyp otyr.
Forým barysynda erekshe nazar aýdarylǵan basty baǵyttardyń biri — ınklıýzıvti qoǵam qalyptastyrý. Búgingi tańda Pavlodar oblysynda 30 myńnan astam múgedektigi bar azamat turady, olardyń 4 200-den astamy — balalar. Erekshe qajettilikteri bar jandardy áleýmettik beıimdeý úshin aımaqta 23 damý jáne erte aralasý ortalyǵy, sondaı-aq 35 arnaıy bilim berý uıymy turaqty jumys istep tur. Inklıýzıvti ortany damytýda «Altyn bata» jáne «Alramı» klýby»qoǵamdyq qorlarynyń eńbegi erekshe. Al izdestirý jumystarymen aınalysatyn «VITA» jasaǵy, patrıottyq baǵyttaǵy «Maıdan joly» uıymy jáne Qyzyl Jarty Aı qoǵamynyń oblystyq fılıaly da eriktilik qozǵalystyń berik dińgegine aınalǵan.
Eriktiler qyzmetin zańnamalyq jáne ınfraqurylymdyq turǵydan qoldaý máselesi de nazardan tys qalmady. QR Mádenıet jáne aqparat mınıstrligi Azamattyq qoǵam isteri komıtetiniń tóraǵasy Gúlbara Sultanova Pavlodar óńiriniń bul baǵyttaǵy kóshbasshylyq ornyn erekshe atap ótti. Pavlodarda 2020 jyldan beri volonterlik bastamalardy shaǵyn granttar arqyly qarjylandyrý mehanızmi sátti júzege asyrylyp keledi. Qazirgi ýaqytta bul salanyń jumysyn Ulttyq front-ofıs úılestirýde. Mınıstrlik ókiliniń habarlaýynsha, jyl sońyna deıin salany sapaly túrde ózgertetin birqatar strategııalyq qujattar men ınnovatsııalyq quraldar qabyldanady. Atap aıtqanda, volonterdiń tsıfrlyq pasporty men volonterlikti damytý ulttyq ındeksi paıda bolady. Sondaı-aq 2030 jylǵa deıingi tujyrymdama qabyldanady.
— Jyldar boıy jınaqtalǵan volonterlik tájirıbeni endi resmı túrde moıyndaý júıesin engizýdi usynyp otyrmyz. Túlekterdiń nemese jastardyń volonterlik belsendiligi joǵary oqý oryndaryna túsý kezinde nemese alǵash jumysqa ornalasý barysynda eskerilýi tıis. Halyqaralyq volonterler jyly aıaqtalǵanymen, bul saladaǵy qoldaý mehanızmderi toqtamaıdy, kerisinshe turaqty ınstıtýt retinde qalyptasady, — dedi Gúlbara Sultanova.
«Ulttyq volonterlik jeli» uıymynyń atqarýshy dırektory Tatıana Mıronıýk Qazaqstannyń bul saladaǵy jınaqtaǵan tájirıbesi halyqaralyq deńgeıde úlgi etýge turarlyq ekenin tilge tıek etti. Búginde respýblıka boıynsha 800-den astam resmı uıym men 3 500-den astam bastamashyl top tirkelgen.
Forýmnyń basty jeńisi — halyqaralyq deńgeıdegi kelisimder men tájirıbe almasý boldy. Qyrǵyz Respýblıkasynan kelgen «Daamdý N» jáne «BýrIs» qorlarynyń negizin qalaýshy Nıshana Jeenalıev Pavlodardaǵy kezdesýdiń nátıjeli bolǵanyn jetkizdi. Meımandar qazaqstandyq áriptesterimen birlesip birneshe jobany júzege asyrýǵa kelisken.
Sondaı-aq, halyqaralyq forým aıasynda pavlodarlyq volonterler úshin jańa halyqaralyq kókjıekter ashylatyny belgili boldy. Olar bıyl eki iri aýqymdy sharada boı kórsetedi: Kaspıı óńirindegi volonterlik aptalyq jáne Astana qalasynda ótetin TMD elderi volonterleriniń forýmy.
Pavlodarda ótken bul halyqaralyq forým azamattyq qoǵamdy damytýǵa, ınklıýzııa mádenıetin tereńdetýge jáne shekaraaralyq dostyqty nyǵaıtýǵa qýatty serpin berdi. Óńir eriktileri endi halyqaralyq jobalardyń belsendi qatysýshysy retinde jańa bastamalardy júzege asyrýǵa kirispekshi.
Eske sala keteıik, Qazaqstan BUU alańynda volonterlikti damytýdyń úzdik tájirıbelerin tanystyrdy.
