Edil Jańbyrshın: Energetıka mınıstrligi aýktsıonnan tys kelisimdermen áýectenip barady

ASTANA. KAZINFORM – Májilis depýtaty Edil Jańbyrshın Energetıka mınıstrligin aýktsıonnan tys tikeleı úkimetaralyq kelisimder jasaýǵa áýestenip ketti dep synady.

— Qazirgi tańda Energetıka mınıstrligi aýktsıonnan tys tikeleı úkimetaralyq kelisimder arqyly birqatar jańartylatyn energııa kózderi jobalaryn iske asyrý tájirıbesin jalǵastyryp otyr. Bul kelisimderde joǵary tarıf, artyq preferetsııalar jáne basqa da táýekeli joǵary normalar kózdelgen. Jańa aıttym, qýattylyǵy 1 GVt jobanyń aýktsıonda anyqtalǵan tarıf baǵasy 18,72 teńge bolsa, osyǵan uqsas kelisim negizinde ratıfıkatsııalanǵa jobalardyń tarıfi budan áldeqaıda joǵary baǵamen iske asyrylmaq. Bul ádis ekonomıkalyq tıimsizdikke, memleket qarjysynyń tıimsiz jumsalýyna, elektr tarıfteriniń ósýine, jańartylatyn energııa kózderine degen senimsizdikke ákelýi múmkin, — dedi ol Májilistiń jalpy otyrysynda.

Sondaı-aq, depýtat bul kelisimderdiń toqsanynshy jyldary munaı alpaýyttarymen jasalǵan ónim bólisý kelisimderine uqsaıtynyn aıtty. 

— Osyǵan uqsas jaǵdaı bizde budan buryn munaı-gaz salasnyda bolǵan. 1990-2000 jyldary kómirsýtek shıkizaty boıynsha ónimdi bóilsý kelisimderi týraly kelisimder sheteldik kompanııalarǵa shamadan tys jeńildikter berip, el múddesine nuqsan keltirgen. Sol qatelikterdi elektr energııasy salasnyda qaıtalamaýymyz kerek. Kez kelgen úkimetaralyq kelisim Májilis qaraýyna tek ratıfıkatsııa satysynda ǵana túsedi. Kelisimniń mazmunyna depýtattardyń áser etý múmkindigi joq. Jańartylatyn energııa kózderiniń jobalaryna arnalǵan barlyq sheshimder aýktsıon arqyly qabyldaýǵa tıis. Eger úkimetaralyq kelisim qajet bolsa, Májilis pen sarapshylardyń talqylaýynan ótý kerek, — dedi Edil Jańbyrshın.

Aıta keteıik, búgingi otyrysta Májilis «Qazaqstan Úkimeti men Birikken Arab Ámirlikteriniń Úkimeti arasyndaǵy jel elektr stantsııasynyń jobasyn iske asyrý týraly kelisimdi ratıfıkatsııalaý týraly» zańdy qabyldady.