Edil Súleımenov paramen ustalardan bir kún buryn «sońǵy» baıandamasyn jasaǵan
ASTANA. QazAqparat - Búgin belgili bolǵandaı, keshe, 28 shilde kúni Astana qalasy ákimdigi Jolaýshylar tasymaly basqarmasynyń basshysy Edil Súleımenov qylmys ústinde ustaldy.
Bir kúnde qatarynan eki para alǵan ol 27 shildede, ıaǵnı, paramen ustalardan bir kún buryn qalalyq qoǵamdyq keńestiń tyńdalymynda halyqqa óz basqarmasynyń jumysy jaıly baıandama jasaǵan.
Búgin Astana qalasy ákimdiginiń janyndaǵy qoǵamdyq keńes jýrnalısterge arnap brıfıng ótkizdi. Brıfıng taqyryby 27 shildedegi Qoǵamdyq keńestiń qoǵamdyq tyńdalymynyń qorytyndysy boldy. Brıfıngke qatysqan Qoǵamdyń keńestiń tóraǵasy Sansyzbaı Esilov paramen ustalǵan sheneýnikterdi jazalaý quqyq qorǵaý organdarynyń jumysy deıdi.
«Árıne, jemqorlyqqa qarsy shara qoldaný, jergilikti problemalar bolsa, oǵan pikir aıtý qoǵamdyq keńestiń mindeti. Biraq, árbir sheneýnik osyndaı jumyspen shuǵyldanyp, qolǵa tússe, zańdy túrde zań qorǵaýshy organdardyń aldynda basymen jaýap berýi kerek. Bizdiń jumysymyz osy máseleni monıtorıng etip, zerttep, neden paıda bolyp jatyr, qaı jolmen tosqaýyl qoıý kerek degen máseleler boıynsha ákimge nemese máslıhatqa usynys bildirý. Edil Súleımenovti isin zerttep, anyqtap, ary qaraı sotqa joldaý quqyq qorǵaý organdarynyń mindeti»,-deıdi Sansyzbaı Esilov.
S.Esilov jolaýshylar basqarmasynyń burynǵy jetekshisi Edil Súleımenovtiń paramen ustalǵanyn búgin estip otyr eken.
«Men Edil Súleımenovtiń ustalǵanyn sizderden estip otyrmyn. Kúni keshe ǵana ol bizdiń aldymyzda qosymsha baıandama jasaǵan edi...Men onymen tikeleı jumys istegen joqpyn. Osyǵan deıin qalalyq máslıhat hatshysymen jumys istegen edik. Ol basqarma jetekshisi bolyp jumys istegennen beri bir jyl tipti odan da az ýaqyt ótken shyǵar...Onyń qolǵa túskenin bilgen joqpyn....»,-dedi S.Esilov.
Sansyzbaı Esilovtiń habarlaýynsha, 27 shilde kúni Edil Súleımenov Astana qalasy ákiminiń birinshi orynbasary Sergeı Horoshýnnan keıin, osy jolaýshylar tasymaly, qoǵamdyq kólik salasynda atqaryp jatqan jumysy týraly qosymsha baıandama jasaǵan. Al, Astana qalasy boıynsha Ulttyq sybaılas jemqorlyqqa qarsy is-áreket departamentiniń habarlaýynsha, Edil Súleımenov joldaǵy kedir-budyr belgilerdiń jóndelgeni týraly jasandy akt qabyldap, onyń ústine, sol kásipkerdi «qara tizimdegi» kásipkerler tizimine engizbeý úshin 1,5 mln teńge, ekinshi kásipkerden aıaldama pavılondaryn syrlaý jáne jýý boıynsha oryndalǵan jumys aktilerine qol qoıǵany úshin para túrinde taǵy 600 myń teńge alǵan.
Bul jumystardyń oryndalmaǵanyn bile tura, oryndaldy dep qol qoıý úshin para suraǵan Edil Súleımenov qoǵam aldynda qoǵamdyq kólik tasymalyn jaqsartý úshin jumys istep jatyrmyz dep baıandama jasaǵan.
Qoǵamdyń keńestiń tóraǵasy Sansyzbaı Esilovten Edil Súleımenovtiń baıandamasyn tyńdaǵan adam retinde onyń «sońǵy» baıandamasy ne jaıly boldy dep suradyq.
«Eki kún buryn ol qoǵamdyq keńestiń aldynda qoǵamdyq kóliktiń jumysy jóninde ákimniń birinshi orynbasary Sergeı Horoshýnnan keıin qosymsha baıandama jasady. Baıandama barysynda qoǵamdyq kóliktiń jaǵdaıy jóninde, ákimdik qoldanatyn sharalar týraly, avtobýstardyń jańarýy, elektrondy tólemaqy jóninde aıtty. Qoǵamdyq jolaýshylar tasymalynyń jaǵdaıy jaqsy degen joq. Biraq búgingi jaǵdaıy jóninde, qoldanyp jatqan sharalar jóninde aıtyp berdi. Jalpy, bári jaqsy dep aıtýǵa ákimshiliktiń aýzy barmaı jatyr. Endigi jyly EKSPO ótedi, al atqaratyn jumys áli kóp»,-dedi E.Súleımenov.
Esterińizge sala keteıik, Astana qalasynyń burynǵy ákimi Ádilbek Jaqsybekov ákimdiktegi basqarmalardyń sanyn qysqarta otyryp, 2015 jyldyń 16 qarashasynda Edil Súleımenovti jolaýshylar kóligi basqarmasynyń basshysy etip taǵaıyndaǵan.
