«Edige bı» jyrynyń qoljazbasy jaryqqa shyqty

ASTANA. KAZINFORM — Qoljazbalar jáne sırek kitaptar ulttyq ortalyǵynyń mamandary qazaq halqynyń qundy muralarynyń biri — «Edige bı» jyrynyń eń kóne qoljazbasyn tsıfrly formatqa kóshirip, faksımıle nusqasyn jaryqqa shyǵardy.

Mádenıet jáne aqparat mınıstrliginiń baspasóz qyzmetiniń málimetinshe, «Edige bı» jyryna arnalǵan qoljazba shamamen XV ǵasyrda belgisiz avtor tarapynan jazylǵan. Atalǵan jyrdyń alǵashqy nusqalaryn XIX ǵasyrdyń basynda qazaq ǵalymy, shyǵystanýshy jáne folklorıst Shoqan Ýálıhanovtyń ákesi Shyńǵys Ýálıhanuly kóshirip jazyp, sol arqyly buryn joǵalyp ketken nusqalardy qaıta qalpyna keltirgen bolatyn.

Keıinnen bul nusqa Shoqan Ýálıhanov tarapynan tolyqtyrylyp, óńdelip, 1842 jyly Ahmet esimdi kisiniń qolymen birikken nusqa retinde kóshirilgen.

—  Atalǵan jyr túrki tilderine tán emes kóne tirkester men sózqoldanystarymen erekshelenedi, bul onyń kóne dáýirlerden qalǵan poema ekenin aıǵaqtaıdy. Bul jaıtqa belgili túrkitanýshy ǵalym P. M. Melıoranskıı óz eńbekterinde erekshe toqtalǵan. Poema Edigeniń dúnıege kelýimen bastalyp, Toqtamystyń uly Qadyrberdiniń qolynan qaza tabýymen aıaqtalady. Ańyz boıynsha, Edige qasıetti Ulytaýdyń bıik shyńdarynyń birinde jerlengen. Qazir bul shyń Edigeniń atymen atalady, — delingen habarlamada.

Aıta keteıik, bul jyr alǵash ret 1905 jyly Sankt-Peterbýrgte professor P. M. Melıoranskııdiń redaktsııasymen «Edige men Toqtamysh týraly ańyz» degen atpen jaryq kórgen.

Budan buryn Astanada dástúrli «KitapTime — 2025» respýblıkalyq kitap festıvali ótkenin jazǵan edik.