Eden jýýshynyń zattaryn bıýlleten dep oılap qalǵan: Almatydaǵy baıqaýshy
Spıkerdiń sózinshe, saılaý ýchaskelerinde óreskel zańbuzýshylyqtar tirkelgen joq.
«Alataý aýdanynda ornalasqan saılaý ýchaskeleriniń birinde eden jýýshy bir zattaryn tastap ketipti. Ony bir adamdar bıýlleten dep oılaǵan. Al Almaly aýdanyndaǵy № 74-shi saılaý ýchaskesinde senimdi ókil kandıdattardyń biriniń paıdasyna jasyryn úgit júrgizip jatqany belgili boldy. Negizi saılaý ýchaskelerine aıtarlyqtaı óreskel zańbuzýshylyq anyqtalǵan joq», - deıdi Aleksandr Bratenkov.
Aıtýynsha, Almatyda saılaýǵa monıtorıng júrgizý úshin baıqaýshylar mektebi 1723 adamdy daıyndady.
Baıqaýshylar mıssııasy – ádil jáne ashyq saılaý ótkizýge kedergi keltiretin kez kelgen quqyq buzýshylyqty baqylaý, túzetý jáne aldyn alý.
«Saılaý tek kandıdattarǵa, daýys berýshilerge ǵana emes, táýelsiz baıqaýshylarǵa da jaýapkershilik júkteıdi. Men jáne áriptesterim táýelsiz baıqaýshylardy tańdap, oqyttyq. Táýelsiz baıqaýshylardyń quramyna ártúrli adamdar kirdi. Olar – jastar, egde jastaǵy adamdar jáne ártúrli áleýmettik top ókilderi», - deıdi ol.
Onyń aıtýynsha, Almatyda saılaýdy baqylaý boıynsha 8 qoǵamdyq uıym akkredıtatsııadan ótti.
«Baıqaýshylardyń bári birdeı saılaý protsesin saýatty jáne bilikti túrde baqylaı almaıdy. Mine sol sebepti, Almatyda «Daýys» qoǵamdyq baıqaýshylar koalıtsııasynyń bastamasymen baıqaýshylar mektebi quryldy – bul respýblıkalyq qoǵamdyq birlestik», - dep bólisti spıker.
Baıqaýshylar mektebiniń treneri Sáýle Alpysovanyń aıtýynsha, olardy daıyndaý barysynda aqparat keńistigi men áleýmettik jelidegi jumysqa erekshe kóńil bólindi.
«Aqparatpen jumys isteý, atap aıtqanda aqparatty durys jetkizý jáne áleýmettik jelilerde jumys isteý boıynsha trenıng ótkizdim. Aqparatpen tek jýrnalıster ǵana emes, baıqaýshylar da jazyp, jumys isteı bilýi kerek», - dedi ol.
