Eddı Hırn: Qomaqty aqsha usynylsa, Karl Froch Gennadıı Golovkınmen shyǵýǵa daıyn
ASTANA. QazAqparat - Promoýter Eddı Hırn brıtandyq boksshy Karl Froch úlken gonorarlar berilgen jaǵdaıda WBA (Super) jáne WBC (Interim) chempıony Gennadıı Golovkınmen shyǵýǵa daıyn ekendigin málim etti.
Bul týraly GGG komandasynyń VKontakte-degi resmı paraqshasynda habarlandy.
Hırn naqty somany aıtqan joq, degenmen Froch Groývzben bolǵan óziniń sońǵy jekpe-jeginde 13 mıllıon dollar alǵan bolatyn.
«Biz Tom Lefflermen osy kezdesý jaıynda kóp sóılestik. Eger PPV kórsetilim qatarynan eki jerde - Anglııada jáne AQSh-ta ótkizilgen bolsa, múmkin osy jekpe-jekti uıymdastyrýǵa qarajat jetip te qalar edi, - deıdi Hırn Behind The Gloves-ke bergen suhbatynda. - Keıde adamdar túsinińkiremeıtin sekildi. «Sizder bul kezdesýdi jankúıerler úshin jasaýlaryńyz kerek», dep aıtyp jatady. Keshirińizder, biraq olaı bolmaıdy. Bul - óte qaýipti sport. Kóp jyldar boıy eńbek etip, tirnektep ataq-abyroıyn jınap kelgen boksshylardyń eshqaısysy jaı ǵana qaýipti jekpe-jekke shyǵa salmaıdy. Eger qarajat qomaqty bolsa, jekpe-jek oryn alady. Karl judyryqtasýǵa daıyn, biraq ol úlken gonorardy qalaıdy».
