ETsQ tirkeýinsiz egov.kz anyqtamalaryn alýǵa bolady

ASTANA. QazAqparat - Qazaqstandyqtar sottalmaǵany týraly anyqtamany elektrondy úkimet portalynan bir rettik sms-qupııasóz arqyly ala alady. Qupııasóz egov.kz portalyna tirkelgende qyzmet tutynýshynyń uıaly telefonyna kelip túsedi. Bul týraly Azamattarǵa arnalǵan úkimettiń baspasóz qyzmeti habarlady.

«Azamattarǵa arnalǵan úkimet» memlekettik korporatsııasy» kásipkerlik emes aktsıonerlik qoǵamynyń basqarma tóraǵasy Abylaıhan Ospanovtyń aıtýynsha, bul jańalyqtar portal qyzmetterin kórsetýdi aıtarlyqtaı jeńildetedi.

«Barlyq qazaqstandyqtarda elektrondyq tsıfrlyq qoltańba joq, bar bolsa da, únemi ózimen birge alyp júrmeıdi. Bir anyqtama úshin Halyqqa qyzmet kórsetý ortalyǵyna barý bárine yńǵaıly emes. Mundaı jaǵdaıda bir rettik qupııasóz arqyly qyzmet kórsetý - tyǵyryqtan shyǵýdyń eń tıimdi joly. Bir rettik qupııasózdi halyqqa qyzmet kórsetý ortalyǵynda JSN telefon nómirine tirkeý arqyly alýǵa bolady. Osylaısha, jaqyn arada ETsQ tirkeýinsiz ózge de memlekettik qyzmetterdi kórsetýge bolady», - dedi Ospanov.

Sonymen birge, bir rettik qupııasózdi alý úshin azamat elektrondy úkimet portalyndaǵy m-gov telefon nómirler derekqoryna tirkelýi kerek.

Joba QR Aqparat jáne kommýnıkatsııalar mınıstrligi men QR Bas prokýratýrasynyń bastamasymen pılottyq rejimde júzege asty. Sonymen birge, qazirgi ýaqytta ózge memlekettik organdardyń memlekettik qyzmet kórsetý protsesterin ońtaılandyrý boıynsha jumystar júrgizilip jatyr.