Echo of Nomads: qazaq ánshisi 20 el qatysqan baıqaýda júldeli boldy
ASTANA. KAZINFORM — Kúlásh Baıseıitova atyndaǵy Qazaq ulttyq óner ýnıversıteti kolledjiniń «Estradalyq vokal» mamandyǵynda bilim alyp jatqan 3-kýrs stýdenti Jasmına Tileýmbetova Qyrǵyzstandaǵy VI Dúnıejúzilik kóshpendiler oıyndary aıasynda ótken Echo of Nomads halyqaralyq etnıkalyq án baıqaýynda ekinshi oryn ıelendi.
Baıqaýǵa álemniń 20 elinen ónerpazdar qatysty. Eń jas qatysýshylardyń biri bolǵan Jasmına dástúrli jáne etnıkalyq mýzyka salasyndaǵy tájirıbeli oryndaýshylarmen qatar óner kórsetip, baıqaý qorytyndysy boıynsha kúmis júldege ıe boldy.
Jas ánshi halyqaralyq sahnada E.Tilepberdıevtiń sózine, B.Tájinovtyń mýzykasyna jazylǵan «Uly dala ıesi» ánin oryndady. Uly dalany, ulttyq mádenıet pen rýhanı murany arqaý etken týyndyǵa halyqaralyq qazylar alqasy joǵary baǵa berdi.
Echo of Nomads baıqaýy VI Dúnıejúzilik kóshpendiler oıyndary aıasynda ótti. Bıyl oıyndarǵa 120 eldiń ókilderi qatysyp, sonyń ishinde 62 memleket mádenı is-sharalarda óner kórsetti. Sporttyq jarystarmen qatar, baǵdarlamada etnomádenı jobalar, ǵylymı alańdar men halyqaralyq shyǵarmashylyq baıqaýlar uıymdastyryldy.
Aıta ketelik «Gúlder» ansambli Dúnıejúzilik kóshpendiler oıyndarynyń «Etno-bı» baıqaýynda Gran-prı ıelengen edi.
