Kongoda eboladan qaıtys bolǵandar sany 900-den asty
ASTANA. KAZINFORM – Kongo Demokratııalyq Respýblıkasynda (KDR) Ebola indetinen kóz jumǵandar sany 930 adamǵa jetti. El bıligi 2,3 myńnan astam rastalǵan juqtyrý deregin tirkedi, dep habarlaıdy Anadoly.
KDR Densaýlyq saqtaý mınıstrliginiń sońǵy málimetine sáıkes, 15 mamyrda indet jarııalanǵannan beri elde Ebola vırýsyn juqtyrýdyń 2 344 rastalǵan jaǵdaıy anyqtalǵan.
Qaıtys bolǵandar sany 930 adamǵa jetip, aýrýdyń ólim-jitim deńgeıi shamamen 40 paıyzdy qurady.
Vedomstvonyń málimetinshe, naýqastardyń basym bóligi eldiń soltústik-shyǵysyndaǵy Itýrı provıntsııasynda tirkelgen. Bılik ókilderi qaýipsizdik jaǵdaıynyń kúrdeliligi men naýqastarmen baılanysta bolǵan adamdardy anyqtaýdaǵy qıyndyqtar indetpen kúresti qıyndatyp otyrǵanyn málimdedi.
Ebola vırýsy gemorragııalyq qyzbanyń asa qaýipti túrleriniń biri. Ol alǵash ret 1976 jyly Sýdannyń Nzara qalasy men Kongo Demokratııalyq Respýblıkasynyń ıAmbýký qalasynda bir mezgilde tirkelgen.
KDR-degi alǵashqy oshaq Ebola ózeniniń mańyndaǵy aýylda anyqtalǵan. Keıin aýrý osy ózenniń ataýymen ataldy.
2013 jyldyń jeltoqsanynda vırýs Batys Afrıkaǵa tarady. 2014–2017 jyldary Gvıneıa, Lıberııa jáne Serra-Leonede bolǵan epıdemııa kezinde shamamen 30 myń adam vırýs juqtyryp, 11 myńnan astamy qaıtys boldy.
Dúnıejúzilik densaýlyq saqtaý uıymynyń (DDU) málimetinshe, qazir KDR-de taralǵan Bundibugyo shtamyna qarsy maquldanǵan vaktsına joq. Sondyqtan indetti aýyzdyqtaýda erte dıagnostıka, baılanysta bolǵandardy jedel anyqtaý jáne der kezinde medıtsınalyq kómek kórsetý sheshýshi ról atqarady.
Buǵan deıin Kongo Demokratııalyq Respýblıkasynda Ebola juqtyrǵandar sany 2 myńnan asqanyn habarlanǵan edi. Sondaı-aq DDU eldegi jaǵdaıdy daǵdarystyq deńgeıde baǵalap, juqtyrý derekteriniń kóbeıýine, qarjylandyrý tapshylyǵyna jáne shuǵyl sharalar qabyldaý qajettigine nazar aýdarǵan bolatyn.
