Eboladan aıyqqan adamdardyń qansha ýaqyt vırýs taratýy múmkin ekeni belgili boldy
ASTANA. KAZINFORM — Ebola bezgeginen aıyqqan adam saýyǵyp shyqqannan keıin de vırýsty 6 aıǵa deıin taratýy múmkin, dep habarlaıdy TASS.
Bul málimetti Reseı bilim akademııasy prezıdentiniń orynbasary, epıdemıolog ári akademık Gennadıı Onışenko aıtty.
Mamannyń sózinshe, Ebola qyzbasy aýyr ótetindigimen ǵana emes, aýrýdan aıyqqan adamnyń 6 aı boıy ınfektsııa qozdyrǵyshyn tarata berýimen qaýipti.
— Ebolanyń qaýiptiligi nede? Adam bul dertten jazylyp, aman qalǵannyń ózinde taǵy 6 aı boıy Ebola vırýsyn aınalasyna juqtyrady, — dedi sarapshy.
Kongo Demokratııalyq Respýblıkasynyń bıligi Ebola bezgeginiń órshýi týraly 15 mamyrda jarııalaǵan bolatyn. Oǵan vırýsqa qarsy vaktsına da, arnaıy emi de joq Býndıbýdjıo shtamy sebep bolǵan. Qolda bar málimetterge sáıkes, bul aýrýdan ólim-jitim deńgeıi 28,8%-ǵa jetti.
Aýrý juqtyrý derekteri kórshiles Ýgandada da tirkelgen. Sondaı-aq Frantsııada Kongodan oralǵan dárigerden Ebola vırýsy anyqtaldy.
Dúnıejúzilik densaýlyq saqtaý uıymy ınfektsııanyń jyldam taralyp jatqanyn málimdedi. Mamandardyń aıtýynsha, indetpen kúreske qaýipsizdik máseleleri, naýqastarmen baılanysta bolǵan adamdardy anyqtaýdaǵy qıyndyqtar jáne jergilikti turǵyndardyń bir bóliginiń medıtsına qyzmetkerlerine senimsizdigi kedergi keltirip otyr.
Al Afrıkanyń aýrýlardy baqylaý jáne aldyn alý ortalyqtary aımaqtaǵy indetke qarsy kúreske shamamen 1,4 mlrd dollar qajet dep baǵalady.
Buǵan deıin Kongoda Ebola bezgeginen qaıtys bolǵandar sany 500-ge jaqyndaǵany týraly habarladyq.
