Ebola indeti: DDU oń ózgerister baıqalǵanyn málimdedi
ASTANA. KAZINFORM – Dúnıejúzilik densaýlyq saqtaý uıymy (DDU) Kongo Demokratııalyq Respýblıkasyndaǵy Ebola indetine qarsy kúreste oń ózgerister baıqala bastaǵanyn habarlady. Alaıda aýrý áli de taralyp, adam ólimine sebep bolyp otyr, dep habarlaıdy TASS.
Bul týraly DDU bas dırektory Tedros Adhanom Gebreıesýs málimdedi.
– Ebola indetimen kúreste basymdyqqa ıe bolyp kele jatqanymyzdy kórsetetin úmittendirerlik belgilerdi baıqaı bastadyq. Emdeý ádisterin synaý jáne saýyǵyp ketken adamdardyń qaıta juqtyrýynyń aldyn alý jumystary qarqyn alyp keledi. Vaktsınalardy synaý aldaǵy aptalarda bastalýǵa tıis. Biraq indet áli de taralyp, adam ómirin qıyp jatqanyn eskerińizder, – dedi ol Africanews telearnasyna bergen suhbatynda.
Kongo DR-dyń Baılanys jáne BAQ mınıstrliginiń málimetinshe, elde Ebola bezgeginen zerthanalyq túrde rastalǵan ólim jaǵdaılarynyń sany 3,5 myńnan asty. Qaıtys bolǵandardyń jalpy sany 3 510 adamǵa, al Ebola vırýsyn juqtyrǵandar sany 7 258 adamǵa jetti. Ólim-jitim deńgeıi 48,4%-dy qurady.
Aýrý belgileri bar 903 naýqas eldegi aýrýhanalar men medıtsınalyq oqshaýlaý ortalyqtarynda em alyp jatyr. Ebola juqtyrǵan adamdarmen baılanysta bolǵan azamattardy baqylaý deńgeıi 78,6%-ǵa jetti.
Búginde Ebola indeti eldegi 26 provıntsııanyń jeteýine taralǵan. Qazirgi indettiń oshaǵy sanalatyn Itýrı provıntsııasyna aýrýdyń rastalǵan jaǵdaılarynyń 78%-y tıesili.
Kongo DR men Ýgandada Ebola indeti 15 mamyrda bastaldy. Ol Afrıkadaǵy bul aýrýdy baqylaý tarıhyndaǵy adam ólimi jóninen ekinshi iri indetke aınaldy. Ýganda 28 shildede Ebola indetiniń aıaqtalǵanyn jarııalady, al DDU bul sheshimdi 25 tamyzda rastady.
Ebolanyń tarıhtaǵy eń iri órshýi 2014–2016 jyldary Batys Afrıkadaǵy Gvıneıa, Lıberııa jáne Serra-Leone aýmaqtarynda tirkelgen. DDU málimetinshe, sol kezde 28,6 myń adam aýrý juqtyryp, 11 myńnan astam adam qaıtys bolǵan.
Ebola vırýsy adamǵa jabaıy janýarlardan juǵady. Adamnyń Ebola vırýsyn juqtyrýynyń alǵashqy jaǵdaıy qazirgi Kongo DR aýmaǵynda 1976 jyly tirkelgen. Qazirgi Ebola indeti – el tarıhyndaǵy 17-shi jaǵdaı.
Aıta keteıik, buǵan deıin Ebola indeti Kongonyń jeti provıntsııasyna taraǵanyn jazdyq.
