Ebola indeti aýqymy boıynsha Afrıkada tórtinshi bolyp otyr
ASTANA. KAZINFORM — Afrıkada Ebola indeti 1976 jyldan beri aýqymy men saldary boıynsha tórtinshi eń iri indet retinde tanyldy, dep habarlaıdy reseılik TASS.
Málimetti Afrıka odaǵyna qarasty Afrıkanyń aýrýlardy baqylaý men saýyqtyrý ortalyǵy málim etti.
Uıymnyń habarlaýynsha, Kongo demokratııalyq respýblıkasy men Ýganda aýmaǵynda tirkelgen.
— Kongo demokratııalyq respýblıkasy men Ýgandadaǵy indet óte kúrdeli sıpat alyp otyr. Qazirgi epıdemııa kezinde Eboladan kóz jumǵandar men aýrý juqtyrǵandar sany boıynsha bul indet burynǵy úsh iri epıdemııadan ǵana keıin tur, — delingen habarlamada.
Qazirgi málimet boıynsha, Eboladan 65 adam qaıtys bolǵan.
Aýrý juqtyrǵandar sany 381 adamǵa jetken.
Budan iri epıdemııalardyń biri Batys Afrıkada 2014-2016 jyldary tirkeldi.
Sol kezeńde 28 616 adam vırýs juqtyryp, 11 325 adam kóz jumǵan.
2018-2020 jyldary Kongo demokratııalyq respýblıkasynyń shyǵysynda bolǵan indet kezinde 3 470 adam syrqattanyp, 2 287 adam qaıtys boldy.
Al Ýgandada 2000-2001 jyldary tirkelgen indet 425 adamǵa juǵyp, 224 adamnyń ómirin qıǵan.
Mamandardyń dereginshe, Afrıkada 1976 jyldan beri Ebola bezgeginiń 30-dan astam oshaǵy tirkelgen.
Osy ýaqyt aralyǵynda indetten qaıtys bolǵandar sany 15 myń adamǵa jýyqtady.
Buǵan deıin DDU Kongoda Ebola indeti kúsheıip bara jatqanyn habarlaǵan bolatyn.
