Ebola: Kenııada karantındik ortalyqtyń ashylýyna qarsy jappaı narazylyq ótip jatyr
ASTANA. KAZINFORM – Kenııanyń Nanıýkı qalasynda júzdegen turǵyn Ebola vırýsyn juqtyrýy múmkin adamdarǵa arnalǵan karantın ortalyǵyn ashý josparyna qarsy narazylyq aktsııasyna shyqty. Narazylar jobany tolyqtaı toqtatýdy talap etip, bılikti 9 maýsymǵa deıin ortalyqty jabýǵa shaqyryp otyr, dep habarlaıdy Euronews.
Josparǵa sáıkes, nysan AQSh-tyń qoldaýymen áskerı baza aýmaǵynda ornalastyrylady.
Narazylyqqa 50 adamǵa arnalǵan ortalyqtyń amerıkalyq azamattar úshin ashylatyny sebep boldy. Bul azamattar Ebola vırýsymen baılanysta bolýy múmkin, alaıda olarda aýrý belgileri baıqalmaǵan.
Joǵarǵy sottyń ortalyq jumysyn ýaqytsha toqtatý týraly sheshiminen keıin jaǵdaı odan ári shıelenise tústi.
Soǵan qaramastan, buqaralyq aqparat quraldarynyń málimetinshe, sońǵy kúnderi Nanıýkı aýdanynda áskerı avıatsııanyń belsendiligi baıqalǵan. Jergilikti sarapshylar muny nysandy iske qosýǵa daıyndyqtyń jalǵasýymen baılanystyrady.
Jalpy, Kenııa bıligi karantın ortalyǵyn qurý josparyn rastady.
Eldiń densaýlyq saqtaý mınıstri Aden Dýaleniń aıtýynsha, bul joba tótenshe sanıtarlyq jaǵdaılarǵa daıyndyqty kúsheıtý jáne qaýipti aýrýlardyń yqtımal órshýine jedel áreket etý múmkindigin arttyrý baǵdarlamasynyń bir bóligi bolyp otyr.
Bastapqy jospar boıynsha ortalyq mamyr aıynyń sońynda jumysyn bastaýy tıis edi. Alaıda onyń bolashaǵy sot talqylaýynyń qorytyndysyna jáne bıliktiń ustanymyna baılanysty bolmaq.
Eske sala ketsek, ótken aptada DDU Ebola indeti baqylaýdan shyǵyp bara jatqanyn málimdedi. Sondaı-aq osy uıymnyń basshysy shekaralardy jabý Eboladan qutqarmaıtynyn aıtty.
Budan bólek, Kongo Demokratııalyq Respýblıkasynda ashýly top Ebola shatyr-aýrýhanalaryn órtep jiberdi.
