Ebola derti: Kongoda ár jarty saǵat saıyn bir adam kóz jumady
ASTANA. KAZINFORM — Kongo Demokratııalyq Respýblıkasynda Ebola indeti buryn-sońdy bolmaǵan jyldamdyqpen taralyp jatyr. Dúnıejúzilik densaýlyq saqtaý uıymynyń (DDU) boljaýynsha, bul aýrýmen kúres tarıhyndaǵy eń aýyr indet bolýy múmkin. Qazir elde ár 30 mınýt saıyn bir adam Eboladan qaıtys bolyp jatyr, dep habarlaıdy BUU jańalyqtar qyzmeti.
BUU Bas hatshysynyń orynbasary, tótenshe jaǵdaılarǵa den qoıý jónindegi úılestirýshi Tom Fletcher álemdegi iri gýmanıtarlyq uıymdardyń basshylary qatysatyn Vedomstvoaralyq turaqty komıtettiń (MPK) shuǵyl otyrysyn ótkizdi. Olar indetke qarsy birlesken sharalardy aıtarlyqtaı kúsheıtýge kelisti.
— Vırýstyń indetke qarsy is-qımylymyzdan ozyp ketýine jol bermeýimiz kere, — dedi BUU ókili.
Qosymsha 30,5 mıllıon dollar bólindi
Fletcherdiń aıtýynsha, maýsym aıynyń basynan beri belgili bir nátıjelerge qol jetkizilgen. Agenttikter oqıǵa ornynda jumys istep jatyr, al BUU aımaqqa Ebola indetine qarsy kúres jónindegi aǵa úılestirýshisin jiberdi. Halyqaralyq donorlar indetpen kúreske 300 mıllıon dollarǵa jýyq qarjy bólgen.
Juma kúni BUU-nyń gýmanıtarlyq máseleler jónindegi basshysynyń orynbasary Tótenshe jaǵdaılarǵa den berýdiń ortalyq qorynan taǵy 30,5 mıllıon dollar bólý týraly sheshim qabyldady. Bul buǵan deıin DKR men kórshiles tórt elge bólingen 24 mıllıon dollarǵa qosymsha qarajat. Fletcher sondaı-aq zardap shekken aımaqqa taǵy 20 maman jiberdi.
— Marqumdardy qaýipsiz ári laıyqty jerleýdi qamtamasyz etetin toptardyń sanyn eki ese arttyrý, emdeý ortalyqtarynyń resýrstaryn úsh esege kóbeıtý, baılanysta bolǵan adamdardy baqylaý júıesin jetildirý jáne tájirıbeli basshylardy tartý qajet, — dedi ol.
Sonymen qatar aımaqtaǵy taza sý men sanıtarııaǵa, medıtsınalyq kómekke jáne basqa da negizgi qyzmetterge degen orasan qajettilikti óteý asa mańyzdy.
— Qazirdiń ózinde eki myńnan astam adam qaza tapty. Taǵy kóptegen adam qaýip tobyna jatady. Álem oıanyp, áreket etýi kerek, — dedi BUU-nyń tótenshe jaǵdaılarǵa den qoıý jónindegi úılestirýshisi.
Іndet altynshy provıntsııaǵa jetti
BUU baspasóz qyzmetiniń búgingi málimetinshe, Býndıbýdjıo vırýsy tarala bastaǵanyna úsh aıǵa jýyq ýaqyt ótkende, indet DKR-dyń alty provıntsııasynda tirkeldi. Ulttyq bıliktiń 12 tamyzdaǵy deregine sáıkes, 4 660-tan astam adamnan aýrý rastalyp, 2 184 adam qaıtys bolǵan. Ólim-jitim kórsetkishi shamamen 47 paıyzdy quraıdy.
Іndet taraǵan saıyn BUU-nyń gýmanıtarlyq agenttikteri de jumys aýqymyn keńeıtip jatyr. Erteńnen bastap Dúnıejúzilik azyq-túlik baǵdarlamasy (DAǴB) Ebolany emdeýge arnalǵan qosymsha ortalyqtarda ystyq tamaq tarata bastaıdy.
Bul kómek ásirese mańyzdy. Óıtkeni DKR-dyń shyǵysynda Ebola indetinen zardap shekken aýdandarda 2,6 mıllıon adam azyq-túliktiń ótkir tapshylyǵyna tap bolyp otyr. Mundaı otbasylardyń jartysynan astamy indettiń oshaǵyna aınalǵan Itýrı provıntsııasynda turady. Al azyq-túlik kómegine qajetti qarjynyń ázirge 25 paıyzy ǵana jınalǵan.
