Ermurat Bapı: Aralas saılaý júıesiniń múmkindigin damyta túsýimiz kerek

ASTANA. KAZINFORM – Májilis depýtaty Ermurat Bapı palatanyń jalpy otyrysynda Parlament saılaýynyń aralas júıesin damyta túsýdi usyndy.

– Men – 25 jyldyq oppozıtsııalyq qoǵamdyq qyzmetten keıin memlekettik bıliktiń bir ókiletti butaǵyna saılaý arqyly kelgen adammyn. Bul aradaǵy negizgi tirek tirkes – saılaý arqyly. Budan 20 jyl buryn joıylǵan bir mandatty majorıtarlyq saılaý jáne saılaný múmkindigi Prezıdent Qasym-Jomart Toqaev bastamashylyq etken reformanyń arqasynda qaıtadan qalpyna kelgeni daýsyz. Biz bul saılaý júıesiniń múmkindigin damyta túsýimiz kerek, - dedi Ermurat Bapı.

Onyń paıymynsha, ýaqyt ótken saıyn atalǵan tásil arqyly Májilisten oryn alǵan depýtattardyń yqpaly artyp keledi.

- Qazaqstan Parlamentiniń Májilisinde majorıtarlyq mandatpen kelgen depýtattardyń bir shoǵyry paıda boldy. Qoǵam men memlekettik bılik arasynda dáneker kópir salýǵa áreket qylyp júrgen bul depýtattardyń dármensiz daýsy barǵan saıyn batyl shyǵa bastaǵanyn qulaǵynda saıası múkistigi joq qaýym estip otyrǵany aıdan anyq, - dedi depýtat.

Aıta keteıik, búgingi Májilis jıynynda Prezıdent Qasym-Jomart Toqaevtyń saıası reformasy talqylanyp jatyr. Oǵan palata depýtattarynan bólek, ǵalymdar men sarapshylar, BAQ basshylary qatysyp otyr.