EAT az ýaqyttyń ishinde alǵa qaraı úlken qadamdar jasady - FATF Prezıdenti
; ALMATY. Maýsymnyń 2-si. QazAqparat /Erlik Erjanuly/ - Qylmystyq kiris pen lańkestikti qarjylandyrýdy zańdastyrýǵa qarsy áreket jónindegi Eýrazııalyq top (EAT) aldaǵy ýaqytta resmı halyqaralyq uıymǵa aınalmaq. Bul búgin Almaty oblysy Talǵar aýdanyndaǵy "Aqbulaq" sporttyq saýyqtyrý kesheninde ótip jatqan EAT-tiń 12-shi otyrysynda aıtyldy,
dep habarlaıdy QazAqparat.
"EAT az ýaqyttyń ishinde alǵa qaraı óte úlken qadamdar jasady. Árıne, óz qyzmetin jetildirýde onda atqarylatyn jumystar áli jetkilikti. Qazir Aram aqshany paıdalanýǵa qarsy kúrestiń qarjylyq sharalaryn jasaıtyn topta (FATF) EAT-qa assotsııalanǵan múshe mártebesin berý jumys máselesin qarap jatyr. Ol maýsym aıynyń orta sheninde Amsterdamda bolatyn basqosýda sheshiledi. Eger ol sátti júzege assa, bul EAT jumysyna beriletin úlken baǵa bolmaq", deıdi FATF Prezıdenti Pol Vlanderen. EAT tóraǵasy Oleg Markovtyń aıtýynsha, bul otyrystyń kún tártibindegi negizgi tarmaqtar EAT quramyn keńeıtý jáne ony halyqaralyq uıym retinde qaıta qurý máseleleri boldy. Osyǵan baılanysty jumys toptarynyń ońasha otyrystarynda EAT-tyń jańa erejesi men bıýdjeti jan-jaqty talqylaýlar jasaldy.
Jalpy 2004 jyly qazanyń 6-sy kúni qurylǵan EAT-tyń quramyndaǵy Belarýs, Qazaqstan, Qytaı, Qyrǵyzstan, Reseı, Tájikstan men Ózbekstannyń qataryna bul otyrysta Túrikmenstan qosyldy. Sondaı-aq baqylaýshy mártebesi Chernogorııa men Serbııaǵa berildi. Buǵan deıin mundaı mártebe Túrikmenstannan basqa taǵy 15 memleket pen 15 halyqaralyq jáne aımaqtyq uıymdarǵa berilgen bolatyn. Buǵan deıin beıresmı uıym sanalyp kelgen EAT endi damýdyń jańa kezeńine aıaq baspaq.
