EasyJet Frantsııa men Portýgalııadaǵy ereýilderge baılanysty júzdegen reısti toqtatýy múmkin
ASTANA. KAZINFORM- EasyJet áýe kompanııasy Frantsııa men Portýgalııadaǵy qyzmetkerler ereýiline baılanysty aldaǵy aptalarda júzdegen reısti toqtatýy múmkin, dep habarlaıdy BILD.
Basylymnyń málimetinshe, bortserikter 2–6 qazan jáne 19–23 jeltoqsan aralyǵynda, ıaǵnı demalys kúnderi jumysqa shyqpaıtynyn málimdegen. Tek qazan aıynda osyǵan baılanysty josparlanǵan 500 reıs toqtatylýy múmkin. Alaıda naqty qaı reısterdiń toqtatylatyny ázirge belgisiz.
Kompanııa ókili BILD-ke bergen túsiniktemesinde jaǵdaıdy jiti baqylap otyrǵanyn aıtty.
— Biz jaǵdaıdyń qalaı órbıtinin muqııat baqylap otyrmyz. Reıske ózgeris engizilgen jaǵdaıda, jolaýshylarǵa tikeleı habarlaımyz, — dedi ol.
Ereýilge portýgalııalyq Sindicato Nacional do Pessoal de Voo da Aviação Civil (SNPVAC) kásipodaǵy bastamashy bolyp otyr. Kásipodaq jalaqyny kóterýdi jáne eńbek jaǵdaıyn jaqsartýdy talap etedi.
Kásipodaqtyń málimdeýinshe, jumys kestesi jıi ózgertiledi, al ujymdyq kelisimder saqtalmaıdy. Sonymen qatar qyzmetkerler jetispegendikten, jumysshylardy qosymsha jumys isteýge májbúrleý úshin qysym kórsetiledi.
Al kompanııa kásipodaqtyń talaptaryn oryndaý múmkin emes ekenin málimdedi. EasyJet ókilderiniń aıtýynsha, kompanııanyń bort qyzmetkerleri qazirdiń ózinde Portýgalııadaǵy ortasha deńgeıden aıtarlyqtaı joǵary jalaqy alady.
EasyJet máseleni ózara kelisim arqyly sheshý úshin kelissózder júrgizilip jatqanyn atap ótti.
Osyǵan deıin habarlaǵanymyzdaı, Manchester áýejaıyndaǵy ushý-qoný jolaǵynda aqaý paıda bolyp, reıster keshikti.
