EAMF: Nobel syılyǵynyń laýreaty AQSh Prezıdentiniń klımatqa qatysty sózin synady
ASTANA. QazAqparat - XIV Eýrazııa medıa forýmynda Nobel syılyǵynyń laýreaty (Úndistan) Radjendra Pachaýrı klımattyń ózgerýine qatysty AQSh Prezıdenti Donald Tramptyń pikirine syn bildirdi, dep habarlaıdy QazAqparat.
"Jasyl" ekonomıka klımattyń ózgerýine yqpal etpeıdi degen tujyrymmen kelispeımin. Bul óz kezeginde ǵalymdardyń zertteýine qaıshy keledi. Sondyqtan jańaratyn energetıka salasyna neǵurlym erterek qadam bassaq, soǵurlym jaqsy bolady. Klımattyń ózgerýine adamnyń yqpaly búginde dáleldengen. Keıbir elderdiń kóshbasshylary klımattyń ózgerýi dáıeksiz, beker tujyrym dep aıtýda. Bul turǵyda AQSh Prezıdenti Donald Trampty meńzep otyrmyn. AQSh basshysy klımattyń ózgerýi negizsiz tujyrym degen kezde, bul pikir aqylǵa qonymsyz sezimdi týdyrady. (...) Bundaı pikirler qabyldaýǵa kelmeıdi",-dedi ol.
Osy oraıda Nobel syılyǵynyń laýreaty klımat júıesine adamzattyń yqpaly aıqyn baıqalyp otyrǵandyǵyn atap ótti.
"Ǵasyrdyń basynan beri muhıttyń ortasha deńgeıi kóterildi, sondyqtan bul turǵyda alańdaýdyń reti joq dep qalaı aıta alamyz? Máselen, araldaǵy memleketter úshin bul ahýal búginde ómirlerine qaýip tóndire bastady. Eger de teńiz daýyly oryn alsa, onda olar úshin jaǵdaı qıyndaıtyny túsinikti ǵoı",-dedi ǵalym.
