EAEO júk tasymalyn baqylaý úshin navıgatsııalyq plombalar qoldanýdy bastaıdy

MÁSKEÝ. KAZINFORM - EAEO-da logıstıkalyq marshrýttardy baqylaý maqsatynda navıgatsııalyq plombalardy qoldaný bastalady, dep habarlaıdy agenttik tilshisi komıssııaǵa silteme jasaı otyryp.

Komıssııanyń málimdeýinshe, sheshim 2026 jylǵy 1 aqpannan bastap kúshine enedi. 

— Kelisimde taýar sanattary men paıdalanylatyn kólik túrlerin eskere otyryp, baqylaý tetigin kezeń-kezeńimen engizý kózdelgen. Іske asyrý úsh kezeńge bólingen, olardyń jalpy uzaqtyǵy 1,5 jyldy quraıdy, — dedi EEK-tiń Kedendik yntymaqtastyq jónindegi mınıstri Rýslan Davydov.

Birinshi kezeńde, 2026 jylǵy 11 aqpannan bastap, navıgatsııalyq plombalar mynadaı jaǵdaılarda qoldanylady:

• sanktsııalyq jáne jekelegen aktsızdik taýarlarǵa, onyń ishinde alkogol men temekige, olardy avtomobıl nemese (jáne) temirjol kóligimen kedendik tranzıt, eksport rásimderi aıasynda, sondaı-aq múshe memleketter arasyndaǵy ózara saýdada tasymaldaǵan kezde;

• kıim-keshek, aıaq kıim, tehnıka sııaqty jekelegen taýar sanattaryna, olardy avtomobıl kóligimen kedendik tranzıt rásimi aıasynda tasymaldaǵan kezde;

• nıkotınquramdy ónimder men nıkotındik shıkizatqa (Eýrazııalyq ekonomıkalyq odaqtyń syrtqy ekonomıkalyq qyzmetiniń biryńǵaı taýar nomenklatýrasynyń 2404, 2939 79 000 0 jáne 2939 80 000 0 pozıtsııalaryna sáıkes), olardy avtomobıl kóligimen EAEO kedendik aýmaǵynan eksport rásimi arqyly áketken kezde.

Eske sala keteıik, Eýrazııalyq ekonomıkalyq odaqta júk tasymalyn baqylaý úshin navıgatsııalyq plombalardy qoldaný týraly kelisim 2022 jylǵy 19 sáýirde qol qoıylyp, 2023 jylǵy 3 sáýirde kúshine engen.

Buǵan deıin qazaqstandyq brokerler endi EAEO bırjasyna qatysa alatyny jazylǵan bolatyn.