EAEO jáne TMD tutynýshylardyń quqyǵyn qorǵaý úshin kúsh biriktiredi

ASTANA. QazAqparat - 25 shildede Eýrazııa ekonomıkalyq komıssııasynyń Tehnıkalyq retteý jónindegi alqa múshesi Valerıı Koreshkov pen TMD Keńesiniń tóraǵasy, Tutynýshylar quqyǵyn qorǵaý jáne adam saýlyǵy salasyndaǵy qadaǵalaý jónindegi federaldyq qyzmet (Reseıdiń tutynýshylar quqyǵyn qorǵaý qyzmeti) basshysy Anna Popova Eýrazııa ekonomıkalyq komıssııasy men Táýelsiz Memleketter Dostastyǵyna múshe-elder tutynýshylarynyń quqyqtaryn qorǵaý jónindegi Konsýltatsııalyq keńestiń arasynda yntymaqtastyq ornatý jónindegi memorandýmǵa qol qoıdy, dep habarlaıdy QazAqparat EAEK baspasóz qyzmetine silteme jasap.

«Komıssııa EAEO-qa múshe-memlekettermen qatar tutynýshylardyń quqyǵyn qorǵap, ónimniń qaýipsizdigin qamtamasyz etý úshin, isin adal atqaratyn óndirýshilerdiń básekege qabilettiligi men halyqtyń ál-aýqatyn jaqsartý úshin barlyq jaǵdaıdy jasaıdy. Táýelsiz Memleketter Dostastyǵy aıasynda jınalǵan mol tájirıbe - eýrazııalyq formatta tutynýshylardyń quqyqtaryn qorǵaýdyń negizi ekeni belgili», - dedi Valerıı Koreshkov.

Onyń aıtýynsha, biryńǵaı qyzmetter naryǵynda tutynýshylardyń quqyqtaryn qamtamasyz etý úshin barlyǵyna birdeı jaǵdaı jasaý - Odaqqa múshe elderdiń birigip áreket etý jolyndaǵy kelesi kezeń bolmaq. Atalǵan jumystar TMD elderiniń salalyq yntymaqtastyq organynyń tájirıbesin esepke ala otyryp atqarylatyn bolady.