EAEO úshin Qytaımen ózara is-qımyl qurý mańyzdy – Qasym-Jomart Toqaev
«Odaqtyń negizgi saıası jáne ekonomıkalyq seriktesi – Qytaı Halyq Respýblıkasymen tıimdi ózara is-qımyl qurý óte mańyzdy. Sonymen birge Qytaı eń iri júk jóneltýshi jáne eń iri klıent bolyp otyr. Ótken aptada men osy elge memlekettik saparmen bardym, onda Sıan qurǵaq portynda Qazaqstannyń logıstıkalyq ortalyǵynyń qurylysyn iske qostyq. Bul port Ortalyq Azııaǵa, Eýropaǵa, Túrkııaǵa jáne Iranǵa tikeleı konteınerlik poıyzdardy jiberýdiń negizgi haby bolady dep kútemiz», - dedi Qasym-Jomart Toqaev «Kóppolıarly álemdegi eýrazııalyq ıntegratsııa» atty Eýrazııalyq ekonomıkalyq forýmda.
Sondaı-aq, Baqty-Aıagóz ýchaskesinde QHR-ǵa jeke shekara ótkelin salý men temirjol qatynasyn bastaý josparlanýda.
Munda Prezıdent Reseımen tabysty yntymaqtastyqqa úmittenetinin aıtty, óıtkeni joba QHR-ǵa tek Qazaqstannan ǵana emes, Batys Sibirden de taýar jetkizý qashyqtyǵy men merzimderin edáýir qysqartady.
«Fızıkalyq ınfraqurylymdy damytýdan bólek, jumsaq ınfraqurylym qurýǵa, ıaǵnı tsıfrlandyrýǵa, kedendik ákimshilendirýdi jeńildetýge jáne ákimshilik júktemeni azaıtýǵa mán berý de óte mańyzdy. Jalpy, biz qazir Eýrazııanyń buǵan deıin eshqashan bolmaǵan jańa irgetasyn qalap jatyrmyz deýge bolady. Eger osy máselege muqııat jáne birlesip qarasaq, aıtarlyqtaı ekonomıkalyq jáne saıası dıvıdendter ala alamyz. Osy turǵyda tolyqqandy jáne syndarly halyqaralyq yntymaqtastyǵymyzdyń qanshalyqty mańyzdy ekenin túsinemiz dep oılaımyn», - dedi Qasym-Jomart Toqaev.
Sol sebepti Prezıdent Qytaımen, Úndistanmen, Vetnammen, Iranmen, Egıpetpen, Izraılmen, Serbııamen jáne basqa seriktestermen belsendi qarym-qatynas odaqtyń jetilýiniń jáne onyń saýda-ekonomıkalyq tartymdylyǵynyń mańyzdy kórsetkishi bolatynyn basa aıtty.
Aıta keteıik, Qasym-Jomart Toqaev Joǵary Eýrazııalyq ekonomıkalyq keńestiń otyrysyna qatysý úshin Máskeýge bardy.
