EAEO Úkimet basshylary Mınskide kezdesedi

ASTANA. QazAqparat - Eýrazııalyq ekonomıkalyq odaqqa múshe memleketterdiń Úkimet basshylary Belarýs elinde kezdesedi. Bul týraly búgin QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«27 qarashada Mınsk qalasynda Úkimet basshylary deńgeıinde Eýrazııalyq úkimetaralyq keńestiń kezekti otyrysy ótedi. Otyrystyń kún tártibi shaǵyn jáne keńeıtilgen quramda qaralatyn 23 tarmaqty qamtıdy.  Otyrys barysynda Eýrazııalyq ekonomıkalyq odaǵy aıasyndaǵy ıntegratsııalyq ózara is-qımyldyń birqatar kókeıkesti máselesi qaralmaq. Úkimet basshylary qol jetken ýaǵdalastyqtardyń aralyq nátıjelerin qorytyndylap, EAEO-nyń odan ári jumys baǵyttaryn belgileıdi», - dedi ol.

Sonymen qatar onyń aıtýynsha, saýda-ekonomıkalyq yntymaqtastyq pen múshe memleketter arasyndaǵy ózara saýdany keńeıtý, ishki naryqtyń jumys isteýine kedergi keltiretin tosqaýyldardy joıý, sondaı-aq ekonomıkanyń jekelegen salalaryndaǵy ıntegratsııalyq áleýetin damytý máselelerine erekshe nazar aýdarylady.

Úkimetaralyq keńestiń músheleri Joǵary Eýrazııalyq ekonomıkalyq keńes sheshimderiniń jobalaryn, Eýrazııalyq jobanyń 25 jyldyǵy men EAEO týraly sharttyń 5 jyldyǵyn toılaý jónindegi is-sharalardyń baǵdarlamalaryn, sondaı-aq elektr qozǵaltqyshy bar kólik quraldary óndirisin qamtamasyz etý men yntalandyrý jáne qoldaný jónindegi is-sharalar baǵdarlamasyn bekitetini josparlanǵan.

«Úkimet basshylary ózara saýdadaǵy tosqaýyldardy joıýǵa, tarıftik jeńildikterdi qoldanýǵa qatysty tapsyrmalardy iske asyrý barysyn qaraýǵa erekshe nazar aýdarady», - dedi Aıbek Smadııarov.