EAEO Týnıspen erkin saýda týraly kelissózderdi bastaıdy
ASTANA. KAZINFORM – Eýrazııalyq ekonomıkalyq komıssııa alqasynyń tóraǵasy Baqytjan Saǵyntaev Týnıspen erkin saýda týraly kelissózder bastalatynyn málimdedi.
EEK basshysy búgin eki mańyzdy halyqaralyq qujatqa qol qoıylǵanyn atap ótti.
– Birinshisi – biz Týnıspen erkin saýda týraly kelissózderdi bastaımyz. EAEO preferentsııalyq kelisimder jelisin kezeń-kezeńimen keńeıtip keledi. Týnıs eýrazııalyq «bestik» elderi úshin Afrıkanyń qarqyndy damyp kele jatqan naryǵyna shyǵatyn strategııalyq baǵyt sanalady, – dedi B. Saǵyntaev elordada BAQ ókilderine arnalǵan brıfıngte.
Spıkerdiń aıtýynsha, ekinshi qujat 2019 jyly Serbııamen qol jetkizilgen jekelegen ýaǵdalastyqtardy jańartý týraly sheshim jóninde. Áńgime qoldanystaǵy erkin saýda týraly kelisim aıasyndaǵy taýarǵa ilespe qujattarǵa qoıylatyn talaptardy jeńildetý týraly bolyp otyr.
– Bul shara EAEO men Serbııa arasynda tasymaldanatyn taýarlardy kedendik rásimdeýdi edáýir jeńildetýge múmkindik beredi. Osylaısha, odaqqa múshe memleketterdiń úshinshi eldermen yntymaqtastyq múmkindikteri keńeıip jatyr. Bul jumys júıeli ári turaqty negizde júrgizilýde, – dedi Baqytjan Saǵyntaev.
Aıta keteıik, Joǵary Eýrazııalyq ekonomıkalyq keńestiń kelesi otyrysy 2026 jyldyń jeltoqsan aıynda Reseıdiń Sankt-Peterbýrg qalasynda ótedi.
Buǵan deıin Memleket basshysy Qasym-Jomart Toqaev EAEO syrtqy ekonomıkalyq baılanystaryn Arab álemi elderimen, Ońtústik-Shyǵys Azııamen, Afrıkamen jáne Latyn Amerıkasymen keńeıtý qajettigin aıtty.
