EAEO taýarlary biryńǵaı ádispen tańbalanady

ASTANA. QazAqparat - Búgin Parlament Májilisiniń jalpy otyrysynda «Eýrazııalyq ekonomıkalyq odaqta taýarlardy sáıkestendirý quraldarymen tańbalaý jónindegi kelisimdi ratıfıkatsııalaý týraly» zań jobasy maquldandy, dep habarlaıdy QazAqparat.

Atalǵan kelisimge Almaty qalasynda 2018 jyldyń 2 aqpanynda qol qoıyldy.

«Kelisimniń negizgi maqsattary taýarlar aınalymynyń zańdylyǵyn qamtamasyz etý, tutynýshylardyń quqyǵyn qorǵaý, kóleńkeli ekonomıkany azaıtý, bıýdjetke salyqtardyń túsimin arttyrý, odaq aýqymynda bıznesti júrgizýdegi básekelestik sharttaryn teńestirý bolyp tabylady. Kelisimniń erejesi tańbalaý engizýdiń tártibi men merzimin belgileýdi, taýarǵa sáıkestendirý quraldarynyń jáne olardy taýarlarǵa jelimdeý biryńǵaı talaptaryn, Eýrazııalyq ekonomıkalyq odaqqa múshe-memleketter arasynda tańbalanǵan taýarlar týraly beriletin málimetterdiń qurylymy men quramyn retteıdi», - dedi QR Qarjy mınıstri Álıhan Smaıylov.

Kelisim boıynsha Kedendik odaq aýmaǵyna ákelingen jáne odaq aýmaǵynda óndirilgen taýarlar tańbalanýǵa jatady. Bul rette, taýarlardy Kedendik odaq aýmaǵynan tysqary jerlerde de tańbalaýǵa ruqsat etiledi.

«Tańbalanatyn taýarlardyń tizbesi odaqqa kiretin elderdiń usynysy boıynsha Eýrazııalyq ekonomıkalyq komıssııa keńesimen biraýyzdan bekitiledi. Ol úshin tańbalaý engizýdiń maqsatqa saı ekendigi týraly tolyq taldaý usyný qajet. EAEO aýmaǵynda jeke taýarlar toptamasyna tańbalaý engizý týraly ortaq sheshim qabyldanǵan jaǵdaıda, bastamashy memleket óziniń zańnamasyna súıene otyryp, tańbalaý engizýge quqyǵy bar. Bul rette, basqa múshe-memleketter ózderiniń nıetteri paıda bolǵan kezde osyndaı tańbalaýǵa qosyla alady», - dedi mınıstr.

Onyń sózine qaraǵanda, keıbir jaǵdaılarda taýarlar tańbalaýǵa jatpaıdy. Mysaly, óndirilgen taýarlardy Odaqtyń kedendik aýmaǵynan syrtqa shyǵarǵan jaǵdaıda jáne jeke tulǵalardyń óz qajettiligi úshin ákelgen taýarlardy tańbalaýdyń qajeti joq.

Aıta ketken jón, búgingi tańda tańbalaý ınstıtýty álemniń kóptegen damyǵan elderinde qalypty jańdaıda qoldanylýda.

«Taýarlardyń árbir birligin tańbalaý jáne ony ımporttaýshydan jáne óndirýshiden bastap sońǵy tutynýshyǵa deıin qadaǵalaý ekonomıkany tsıfrlandyrýdyń tıimdi quraldarynyń biri bolady dep esepteımin. Kelisimdi iske asyrý respýblıkalyq bıýdjetten qarjy shyǵarýyn qajet etpeıdi», - dedi Álıhan Smaıylov.