EAEO shartyna túzetýler paketi memleketishilik kelisýge jiberiledi

MÁSKEÝ. QazAqparat – 25 mamyrda Eýrazııalyq ekonomıkalyq komıssııa alqasy Eýrazııalyq ekonomıkalyq odaq týraly shartqa engizilgen ózgeristerdi qamtıtyn «II úlken hattama» jobasyn maquldady. Qujat memleketishilik kelisýge jiberilmek. Bul týraly QazAqparat EEK baspasóz qyzmetine silteme jasap habarlaıdy.

«II úlken hattama» jobasy 130-dan astam túzetýdi qamtıdy. Olar quqyq qoldaný praktıkasy barysynda anyqtalǵan quqyq retteýdegi olqylyqtardy joıýǵa, Shartta qoldanylatyn termınologııanyń birkelki etýge, komıssııaǵa birqatar ókilettikter berýge jáne Eýrazııalyq ekonomıkalyq ıntegratsııany damytýdyń 2025 jylǵa deıingi strategııalyq baǵyttarynyń is-sharalaryn iske asyrýǵa baǵyttalǵan», – dedi Integratsııa jáne makroekonomıka mınıstri Sergeı Glazev.

«II úlken hattamaǵa» EAEO shartynyń «Múshe memleketter eńbekshileriniń eńbek qyzmeti» atty 97-babyna ózgerister engizildi. Atap aıtqanda, Odaqtyń basqa memleketinde pedagogıkalyq jáne Zań qyzmeti salasynda jumys isteýge úmitker eńbekshiler úshin qoldanystaǵy shekteýlerdi alyp tastaý usynylady.

Qazir olar jumysqa ornalastyrýshy memlekettiń zańnamasynda belgilengen bilim týraly qujattardy taný rásiminen ótýi tıis. Sondaı-aq usynylǵan ózgeristerdiń biri – jumys isteıtin adamdarǵa jumys isteıtin memlekettiń aýmaǵynan shyqpaı-aq kirý maqsatyn ózgertý múmkindigi.

Budan bólek, qujatta komıssııaǵa standarttaý, arnaıy qorǵaý, dempıngke qarsy jáne ótemaqy sharalary, sanıtarııalyq, veterınarııalyq-sanıtarııalyq jáne karantın fıtosanıtarııalyq sharalar, básekelestik, tabıǵı monopolııalar sýbektileriniń qyzmetin retteý bóliginde ókilettikter berý usynylady.