EAEO: Serik Jumanǵarın taýarǵa shekteý engizý kezinde erejeni saqtaýǵa shaqyrdy
«Kóbine sanıtarlyq, veterınarlyq jáne karantındik fıtosanıtarlyq sharalarmen aınalysatyn mekemeler taýarlardyń sapasyn qadaǵalaıtyn organ qyzmetin atqarmaıdy. Olar kóp jaǵdaıda naryqta formaldy nemese formaldy emes retteýshige aınalady. Árıne, osyndaı jaǵdaıǵa jol bermeý kerek. Sebebi barlyǵy túsinikti bolýy tıis. Sáıkesinshe, naryqtaǵy tártip ashyq bolýy shart», - dedi Serik Jumanǵarın.
Sonymen qatar EEK Alqa Múshesi Qazaqstanda qandaı da bir taýardy saýdalaýǵa tyıym salýdy engizý máselesine toqtaldy.
«Qandaı da bir taýarǵa tyıym salý, ýaqytsha shekteýlerdi, kúsheıtilgen qadaǵalaýdy engizý máselesine toqtalsaq, bul turǵyda árbir jaǵdaıda tyńǵylyqty tekserý kerek. Sebebi bul protsester aıtarlyqtaı kúrdeli. Jaqynda biz qazaqstandyq tarapqa qatysty máseleni Alqada qarastyrdyq. Atap aıtqanda, reseılik ónimge qatysty engizilgen shekteý óte durys boldy. Alaıda, tıisti tártiptiń rásimderi oryndalmaǵan. Negizi, taraptar men barsha odaqty tıisti túrde habardar etýi kerek edi. Nátıjesinde, osy shekteý sharalaryn joıýǵa májbúr boldyq. Belgilengen tártip boıynsha máseleni qarastyryp, shekteýdi engizý kerek, ıaǵnı buǵan eshkim de tyıym salmaıdy. Sebebi sapasyz ónim naryqtarǵa jetkizilmeýi tıis», - dedi Serik Jumanǵarın.
Budan buryn habarlanǵandaı, Eýrazııalyq ekonomıkalyq komıssııanyń básekelestik boıynsha Alqa múshesi (mınıstri) Serik Jumanǵarın EAEO aıasynda saýda erejelerin buzǵandar týraly aıtyp berdi.
Sonymen qatar ol kásipkerler úshin biraz kedergiler bar ekenin jáne olardyń jartysy – zańdy, jartysy zańsyz ekenin atap ótti.
«Zańsyz kedergilermen qalaı kúresýge bolady? Bul turǵyda aryz jazý kerek. Osy oraıda bul shaǵymdar qaralyp, komıssııaǵa shyǵarylady. Kedergi jasap otyrǵan memleketke qatysty sheshim qabyldanady. Bul sheshimdi olar úsh aıdyń ishinde oryndaýy tıis. Al oryndamasa, keńestiń qaraýyna usynamyz, másele joǵary deńgeıde talqylanady», - dedi S. Jumanǵarın.
