EAEO Premer-Mınıstrleri «Digital Almaty» forýmyna qatysty
Forým bastalmastan buryn Úkimet basshysy sharanyń arnaıy shaqyrylǵan qonaǵy – BUU Bas hatshysynyń orynbasary F. Hohshıldpen kezdesý ótkizdi, onda BUU tsıfrlyq kún tártibiniń ózekti máseleleri, sondaı-aq Qazaqstannyń aımaqta tsıfrlandyrý men ınnovatsııalardy ilgeriletýdegi róli talqylandy.
«Derekter men jasandy zerde negizinde turaqty aımaqty qurý» taqyrybyndaǵy forýmnyń plenarlyq sessııasynda sóılegen sózinde QR Premer-Mınıstri Qazaqstanda jasandy zerdeni qoldanýdan bolatyn jalpy ekonomıkalyq tıimdilik jylyna shamamen $25 mlrd quraýy múmkin ekenin atap ótti. Eń úlken nátıje qyzmet kórsetý salasynda – jylyna $15 mlrd-qa deıin, jáne taý-ken óndirý salasynda – $9 mlrd-qa deıin kútilýde. Astana Hub halyqaralyq AT-startaptardyń tehnoparki ınnovatsııalyq ortalyq bolýǵa shaqyrylady, onyń negizinde «Alem» AT baǵdarlamalaý mektebi oqytýdyń zamanaýı tásilderi men ádisterin qoldana otyryp jumys isteıdi.
«2019 jyldyń qyrkúıeginde biz ınnovatsııalyq AT-ýnıversıtetti ashtyq. Qazirgi ýaqytta AT-ýnıversıtettiń Amazon jáne UNICEF sekildi aldyńǵy qatarly AT kompanııalarmen jáne damý ınstıtýttarymen yntymaqtastyq máselesi pysyqtalýda. «Astana» halyqaralyq qarjy ortalyǵy negizinde baǵdarlamalaýshylardy daıyndaýǵa mamandanǵan Qwazar kompanııasymen birge ınnovatsııalyq baǵdarlamalaý mektebin ashý josparlanýda», — dedi A. Mamın.
Úkimet basshysy Dúnıejúzilik ekonomıkalyq forýmmen (DEF) birlesip «Astana» halyqaralyq qarjy ortalyǵy bazasynda DEF Tórtinshi ónerkásiptik revolıýtsııa ortalyǵyn iske qosý týraly kelisimge qol jetkizilgenin atap ótti. Ol osy jyldyń sońyna deıin iske qosylady dep kútilýde.
Premer-Mınıstr Qazaqstanda Smart Data Ukimet jobasy aıasynda jasandy zerde tehnologııalaryn paıdalaný boıynsha alǵashqy qadamdar jasalǵanyn atap ótti. Nazarbaev Ýnıversıtetiniń bazasynda Smart júıeler jáne jasandy zerde ınstıtýty quryldy.
«Nazarbaev Ýnıversıtetiniń qolda bar áleýeti negizinde, Dúnıejúzilik bankpen birlesip, óz zerthanasy, derekterdi óńdeý zertteý ortalyǵy jáne jasandy zerdeni damytý jónindegi ǵylymı parki bar Jasandy zerde ulttyq klasterin qurý josparlanýda. Barlyq salalarda jáne iri kompanııalarda jasandy zerdeni engizý boıynsha júıeli jumys júrgizilip jatyr», — dedi A. Mamın.
Úkimet basshysy jasandy zerde tehnologııalaryn damytýǵa qolaıly jaǵdaılar jasaý úshin EAEO aıasynda úılestirilgen sharalardy qabyldaýdyń qajettigin atap ótti.
«Jalpy standarttar men erejelerdi ázirleý, derektermen almasý jáne ıntegratsııa salasyndaǵy saıasatty ázirleý, ǵylymı-zertteý qyzmetin damytýda belsendi ózara is-qımyldy ornatý mańyzdy», — dedi A. Mamın.
Premer-Mınıstr kólik jáne logıstıka salasynda jasandy zerdeni qoldaný tranzıttik baǵyttardy ońtaılandyrýǵa yqpal etetinin, keden salasynda shekaralardan ótý ýaqytyn jedeldetetinin, saýdada kóleńkeli jáne kontrafaktilik aınalym kólemin azaıtatynyn atap ótti.
Forýmnyń plenarlyq sessııasyna Belarýs Premer-Mınıstri S. Rýmas, Reseı Premer-Mınıstri M. Mıshýstın, Moldova Premer-Mınıstri I. Kıký, Qyrǵyzstan Premer-Mınıstriniń orynbasary J. Razakov jáne Armenııa Premer-Mınıstriniń orynbasary M. Grıgorıan, EEK Alqasynyń tóraǵasy T. Sarkısıan, BUU Bas hatshysynyń orynbasary F. Hohshıld, «Amazon Web Services» úkimetti transformatsııalaý jónindegi dırektory L. Maksvell, «01 Edu system» negizin qalaýshy N. Sadırak jáne Ulybrıtanııa Memlekettik tsıfrlyq qyzmetiniń dırektory K. Fergıýson qatysty.
EAEO múshe memleketter úkimetteriniń basshylary «Qala úshin eń úzdik AT-sheshim», «Úzdik startap-joba», «Big Data – jyl kompanııasy», «Memlekettik sektordaǵy úzdik AT-joba», «AT-daǵy jyl áıeli», «Jyldyń AT-chempıony» nomınatsııalarynda «Digital Almaty Awards» baıqaýynyń jeńimpazdaryna syılyqtar tabys etti.
Forýmǵa qatysýshylar quqyq qorǵaý, qarjy-bank, bilim berý jáne medıtsınalyq salalardaǵy úderisterdi avtomattandyrý jáne tsıfrlandyrý boıynsha Qazaqstannyń AT-kompanııalary men startap jobalarynyń kórmesimen tanysty.
