EAEO: Ortaq gaz naryǵyn qurýdyń ekinshi kezeńine ótý sheshimi qabyldandy

MÁSKEÝ. QazAqparat – Eýrazııalyq ekonomıkalyq odaq elderi Memleket basshylarynyń otyrysynda ortaq gaz naryǵyn qalyptastyrýdyń ekinshi kezeńine ótý sheshimi qabyldandy. Bul týraly brıfıng barysynda Eýrazııalyq ekonomıkalyq komıssııa Alqasy tóraǵasynyń kómekshisi Iıa Malkına málim etti, dep habarlaıdy «QazAqparat» HAA menshikti tilshisi.

«Ekinshi kezeń – bul naryqty qalyptastyrýdyń ınfraqurylymdyq, tehnologııalyq jáne quqyqtyq negizin qurý. Bul kezeńdi iske asyrýdyń negizgi nátıjeleriniń biri Odaqtyń ortaq gaz naryǵyn qalyptastyrý týraly halyqaralyq kelisim bolmaq», - dedi Iıa Malkına.

Onyń aıtýynsha, qujattyń negizgi bóligi kelesi aspektilerden turatyn bolady:

- ortaq gaz naryǵynyń qyzmeti jáne ony retteý prıntsıpi;

- úshinshi elderden jáne úshinshi elderge gazdy tasymaldaý jáne jetkizý kezinde Odaq elderiniń ózara árekettesý tártibi;

- gazkóliktik júıelerge qoljetimdilikti qamtamasyz etý prıntsıpi;

- Odaqtyń ortaq gaz naryǵynda baǵany túzý jáne tarıftik saıasatty qalyptastyrý prıntsıpi jáne taǵy basqalary.

«Kelisimdi ázirleý 2021 jyly aıaqtalatynyna úmittenemiz. Memleketter basshylary birinshi kezeń is-sharalaryn taıaý ýaqytta aıaqtaýdy tapsyrdy. Atap aıtqanda, bul - Odaq elderi aýmaǵynda ornalasqan gazkóliktik júıelerge qoljetimdiliktiń biryńǵaı erejesi týraly qujatty pysyqtaýǵa qatysty. Komıssııa birinshi kezeń qujattarynyń jobasyn aldaǵy taıaý ýaqytta joba ázirleýshilerinen kútetin bolady», - dedi ol.