EAEO ónerkásip óndirisiniń kólemi 1,5 trln dollarǵa jetti - Álıhan Smaıylov

ALMATY. QazAqparat- 2022 jyly EAEO ónerkásip óndirisiniń kólemi 1,5 trln dollarǵa jetti. Bul týraly QR Premer-Mınıstri Álıhan Smaıylov Eýrazııalyq úkimetaralyq keńestiń keńeıtilgen quramdaǵy otyrysynda aıtty, dep habarlaıdy QazAqparat tilshisi.

QR Premer-Mınıstri 2022 jyly EAEO ónerkásip óndirisiniń kólemi 1,5 trln dollarǵa jetkenin atap ótti. Onyń ishinde Qazaqstanda 1,1 paıyz ósimmen 100 mlrd dollardy qurady. EAEO aýylsharýashylyq ónimderiniń óndirisi de artyp keledi. 2022 jyly óndiris 5%-ǵa artty. Bul rette eń úlken ósim bizdiń elde baıqalady- 9 paıyz.

«Alaıda bul kórsetkishter Eýrazııalyq ekonomıkalyq odaqtyń naqty áleýetine sáıkes kelmeıdi. Eýrazııalyq ıntegratsııanyń múmkindikteri tolyq paıdalanylmaı jatyr dep esepteımin. Biz sharany is júzinde júzege asyrýǵa, EAEO-nyń 2025 jylǵa deıingi damý strategııasyna jáne EAEO týraly kelisimge barynsha shoǵyrlanýymyz kerek. Bul, eń aldymen, ózara saýdadaǵy kedergilerdi joıý», - dedi Úkimet basshysy.

Álıhan Smaıylov kedergilerdi joıýdaǵy oń dınamıkaǵa qaramastan, ishki shekaralarda kedendik baqylaý elementteri áli de bar ekenin atap ótti.

«Іs júzinde memlekettik satyp alýda ulttyq rejım joq, sanıtarlyq, veterınarııalyq shekteýler jáne taǵy basqalary keńinen qoldanylyp jatyr. Munyń barlyǵy bizdiń elderimizdiń bıznesine EAEO artyqshylyqtaryn tolyq paıdalanýǵa múmkindik bermeıdi», - dedi Álıhan Smaıylov.

Onyń aıtýynsha, Eýrazııalyq ekonomıkalyq odaq keńistiginde úzdiksiz saýda aǵynyn qalyptastyrý da basym baǵyt bolýy tıis.