EAEO ókili: Endigi mindet — tsıfrlyq Jibek jolyn qurý
ASTANA. KAZINFORM — Eýrazııalyq ekonomıkalyq odaqta kólik salasyna jasandy ıntellekt pen jańa tsıfrlyq tehnologııalardy engizýge arnalǵan sharalar ázirlenip jatyr. Olar EAEO-nyń 2027–2029 jyldarǵa arnalǵan kólik saıasatyn iske asyrý jónindegi jol kartasyna engizilgen. Bul týraly New Silk Way halyqaralyq forýmynda Eýrazııalyq ekonomıkalyq komıssııanyń kólik jáne ınfraqurylym jónindegi múshesi Arzybek Kojoshev málimdedi.
Onyń aıtýynsha, qazir atalǵan qujatty ázirleý jáne kelisý jumystary aıaqtalýǵa jaqyn.
— Biz 2027–2029 jyldarǵa arnalǵan jol kartasynyń jobasyn ázirleýdi jáne kelisýdi aıaqtap jatyrmyz. Oǵan kólik salasynda tsıfrlyq jáne ıntellektýaldy tehnologııalardy damytýǵa, sonyń ishinde jasandy ıntellektini engizýge baǵyttalǵan birqatar shara engizildi. Bul naqty oryndalý merzimderi men kútiletin nátıjeleri kórsetilgen qujat bolady, — dedi Arzybek Kojoshev.
EEK ókiliniń aıtýynsha, jol kartasyn bıyl qabyldaý josparlanyp otyr. Odan keıin odaqqa múshe memleketter qujatta belgilengen sharalardy birlesip júzege asyrady.
Sondaı-aq spıker qazirgi halyqaralyq tasymalda jasandy ıntellekt pen tsıfrlyq tehnologııalardyń mańyzy artyp kele jatqanyn atap ótti. Onyń sózinshe, budan eki myń jyldan astam ýaqyt buryn Uly Jibek joly elder arasyndaǵy saýda men ekonomıkalyq baılanystyń damýyna jol ashty. Endigi mindet — osy tarıhı baǵyttyń zamanaýı tsıfrlyq úlgisin qalyptastyrý.
— Eki myń jyldan astam ýaqyt buryn Uly Jibek joly elder arasyndaǵy saýda men ekonomıkalyq baılanystyń damýyna jol ashty. Búginde zaman ózgerdi, jańa tehnologııalar paıda boldy. Endigi mindet — tsıfrlyq Jibek jolyn qalyptastyrý. Buryn taýar kerýenmen tasymaldansa, qazir júk tasymalyn uıymdastyrýda tsıfrlyq tehnologııalar men jasandy ıntellekt keńinen qoldanylyp keledi. Biraq negizgi maqsat sol kúıinde qaldy. Ol — júkterdiń kedergisiz, ýaqytyly ári turaqty jetkizilýin qamtamasyz etý, — dedi Arzybek Kojoshev.
Ol tsıfrlyq logıstıkany damytý bir eldiń ǵana emes, barlyq seriktes memlekettiń úılesimdi jumys isteýine baılanysty ekenin jetkizdi.
— Tsıfrlyq logıstıka — tehnologııalar jarysy emes, bul birlesken jumys. Ár memleket óz úlesin qosý arqyly ortaq nátıjege qol jetkizedi. Bolashaqtyń kólik dálizderi qazirdiń ózinde qalyptasyp jatyr, — dedi Arzybek Kojoshev.
Eske salaıyq, elordada Qazaqstannyń Kólik aptalyǵy aıasynda «NEW SILK WAY» VIII halyqaralyq bıznes-forýmy ótip jatyr. Atalǵan is-shara — kólik-logıstıka salasyn damytýdyń ózekti máselelerin talqylaýǵa, halyqaralyq yntymaqtastyqty nyǵaıtýǵa jáne Eýrazııanyń kólik dálizderiniń tıimdiligin arttyrýǵa arnalǵan negizgi halyqaralyq alańdardyń biri.
Bıyl forým Qazaqstan men 39 ózge memleketterden kelgen ókilderdiń basyn qosty. Іs-sharaǵa memlekettik organdardyń, halyqaralyq uıymdardyń, kólik-logıstıkalyq kompanııalardyń, salalyq birlestikter men sarapshylar qaýymdastyǵynyń 2 000-ǵa jýyq ókili qatysady dep kútilýde. Qatysýshylar qatarynda 338 uıymnyń ókilderi bar.
Buǵan deıin Qazaqstan júk tasymalyn JI arqyly basqarýdy josparlap otyrǵany habarlandy.
