EAEO-nyń perspektıvti tendentsııalary qandaı
«Búgin biz Eýrazııalyq ekonomıkalyq odaqtyń kelesi jylǵa arnalǵan basty halyqaralyq baǵyt-baǵdaryn bekitemiz. Odaq jahandyq deńgeıde abyroıly birlestikke aınaldy. Ekonomıkalyq odaqty iri ASEAN, ShYU sekildi halyqaralyq uıymdarmen baılanystyrýda perspektıvti tendentsııalar baıqalady. Qazirgi tańda Joǵary keńestiń otyrysynda Sıngapýr memleketimen erkin saýda júrgizý týraly kelisimge qol qoıyldy. Sıngapýr – bizdiń odaqpen kelisimge kelgen Vetnammen birge ekinshi memleket. Iran Islam Respýblıkasymen saýda-ekonomıkalyq, logıstıkalyq yntymaqtastyq ornatýdyń da mańyzy zor. Irandyq áristesterimizben birge biz osy jyldyń 27 qazanynda kúshine enetin erkin saýda jónindegi Ýaqytsha kelisimniń áleýetin tolyqqandy paıdalana alamyz», - dedi Qasym-Jomart Toqaev Erevanda ótken Joǵary Eýrazııalyq ekonomıkalyq keńestiń otyrysynda.
Qazaqstan Prezıdenti boı kóterip kele jatqan seriktestermen saýda-ekonomıkalyq baılanystardy nyǵaıtýdyń mańyzy zor ekenin atap ótti.
«San emes, sapa mańyzdy rólge ıe. Bizdiń odaq alǵa jyljyp keledi. Qazaqstannyń Tuńǵysh Prezıdenti, Joǵary Eýrazııalyq ekonomıkalyq keńestiń qurmetti Tóraǵasy Nursultan Ábishuly Nazarbaevtyń ıdeıasy óziniń qajettiligi men tıimdiligin dáleldedi. Uıym qyzmetin bastaǵaly beri ekonomıkalyq ózara qarym-qatynastyń aýqymy keńeıip, ekonomıkalyq odaqqa múshe elderdiń báriniń ekonomıkasyna óz úlesin qosty. Qabyldanǵan sheshimder ıntegratsııalyq birlestikti ary qaraı damytýǵa, qol jetkizilgen kelisimdi tolyqqandy oryndaýǵa baǵyttalǵan. Barlyq kelisimder men mindettemelerdi tıimdi júzege asyrý – komıssııa men Úkimetterdiń negizgi mindeti», - dedi Memleket basshysy.
Aıta ketsek, Qazaqstan Prezıdenti Qasym-Jomart Toqaev qatysqan Joǵary Eýrazııalyq ekonomıkalyq keńestiń otyrysy «Habar 24» arnasynda tikeleı efırde kórsetildi.
Eske salsaq, Armenııa astanasynda Joǵary ekonomıkalyq keńestiń otyrysy ótti. Іs-sharaǵa Qazaqstan Prezıdenti Qasym-Jomart Toqaev, Belarýs Respýblıkasynyń Prezıdenti Aleksandr Lýkashenko, Qyrǵyz Respýblıkasynyń Prezıdenti Sooronbaı Jeenbekov, Reseı Federatsııasynyń prezıdenti Vladımır Pýtın, Armenııanyń Premer-mınıstri Nıkolaı Pashınıan jáne Eýrazııalyq ekonomıkalyq komıssııa Alqasynyń tóraǵasy Tıgran Sarkısıan qatysty.
