EAEO-nyń qaı elderinde eń jas mınıstrler qyzmet etip júr
NUR-SULTAN. QazAqparat – Eýrazııalyq ekonomıkalyq odaq elderindegi jasy úlken mınıstrler Reseı, Belarýs jáne Qazaqstanda jumys istep jatyr, dep habarlaıdy QazAqparat Ranking.kz-ke silteme jasap.
Atap aıtqanda, zertteý barysynda mınıstrlerdiń jas ereksheligi boıynsha reıtıng jasalǵan.
Bıyldyń basynda EAEO elderi mınıstrleriniń ortasha jasy 49,3 jyldy qurady. Eń jas mınıstrler Armenııada eken: osy eldegi vedomstvo basshylarynyń ortasha jasy - 45,3. Al jasy úlken mınıstrler Reseıde tirkeldi, ıaǵnı bul eldegi basshylardyń ortasha jasy 52,2 boldy. Qazaqstan reıtınginiń ortasynda ornalasty, elimizdegi mınıstrlerdiń ortasha jasy 48-ge jetti.
Eýrazııalyq ekonomıkalyq odaq elderi arasynda Reseıdegi Syrtqy ister mınıstri Sergeı Lavrovtyń (70,8 jasta) jasy úlken eken. Eń jasy - Armenııanyń Ádilet mınıstri Rýstam Badasıan, ol 30-ǵa tolǵan.
Qazaqstandaǵy vedomstvo basshylary arasynda Іshki ister mınıstri Erlan Turǵymbaev (58 jasta) pen Qorǵanys mınıstri Nurlan Ermekbaevtyń (58 jasta) jasy úlken. Sonymen qatar elimizdegi eń jasy - 1986 jyly dúnıege kelgen Ulttyq ekonomıka mınıstri Áset Erǵalıev.
