EAEO-nyń qarjy naryǵyn retteýshi Qazaqstanda ornalasady

ASTANA. QazAqparat - «Astana» halyqaralyq qarjy ortalyǵy EAEO-nyń ortaq qarjy naryǵyn retteýshige prototıp bola alady. Bul týraly búgin Astana Finance Days sessııasynda  Eýrazııalyq ekonomıkalyq komıssııa alqasynyń tóraǵasy Tıgran Sarkısıan aıtty, dep habarlaıdy QazAqparat tilshisi.

«Eýrazııalyq ekonomıkalyq odaqtyń barlyq elderi ortaq progressıvti qarjylyq quziret qurýǵa múddelilik tanytyp otyr. Ortalyqtyń («Astana» qarjy ortalyǵy) qurylýy táýelsiz qorlardy basqarý ádisterin jaqsartýǵa múmkindik berip, bilim men tehnologııa transfertin jeńildetý arqyly adamı kapıtal damýynyń artýyn qamtamasyz etedi dep sanaımyn. Sońǵysy tek Qazaqstannyń ǵana emes, sonymen birge EAEO-nyń da tabystylyǵy men damýynyń negizi bolady», - dedi ol.

Onyń paıymynsha, bul Astanany tek qarjy emes, sonymen qatar ǵylymı-bilim berý, kásibı, óndiristik, óńirlik jáne qyzmet salalary aıryqsha damyǵan halyqaralyq ortalyqqa aınaldyrý úshin mańyzdy bola túsedi.

«Taıaý birneshe jyldyń ishinde bul joba qarqyn alyp, qýatty draıverge aınalaryna senimdimin. Tipti ol («Astana» qarjy ortalyǵy) ortalyq qarjylyq naryqtyń keıbir elementterin retteý úshin prototıp te bola alady. Bizdiń odaqtyq shartqa sáıkes 2025 jylǵa qaraı ortaq qarjylyq naryqty iske qosýǵa tıispiz jáne aldyn ala kelisimge oraı retteýshi Qazaqstanda ornalasady. Sondyqtan AHQO basymdyǵy EAEO-men baılanysty. Keri de dál solaı», - dedi Tıgran Sarkısıan.