EAEO Nursultan Nazarbaevtyń janqııarlyq eńbeginiń jemisi - Ámirhan Rahymjanov
NUR-SULTAN. QazAqparat - Eýrazııalyq ekonomıkalyq odaq Nursultan Nazarbaevtyń janqııarlyq eńbeginiń jemisi. Bul týraly búgin «Ideıadan - shynaıy bolmysqa: Nursultan Nazarbaevtyń eýrazııalyq bastamasyna 25 jyl» atty halyqaralyq ǵylymı-tájirıbelik konferentsııa barysynda QR Tuńǵysh Prezıdenti - Elbasy kitaphanasynyń dırektory Ámirhan Rahymjanov aıtty, dep habarlaıdy QazAqparat tilshisi.
«Búgingi álemdik deńgeıde mańyzy bar sharanyń 2000 jyly Eýrazııalyq ekonomıkalyq qoǵamdastyqty, al 2014 jyly Eýrazııalyq ekonomıkalyq odaqty qurý týraly sharttar qol qoıylǵan Qazaqsannyń astanasy Nur-Sultan qalasynda ótýi qýantarlyq jaıt. Shırek ǵasyr buryn, 1994 jyldyń 29 naýryzynda M.Lomonosov atyndaǵy Máskeý memlekettik ýnıversıtetiniń minberinen Qazaqstannyń Tuńǵysh Prezıdenti - Elbasy Nursultan Nazarbaev reeılik ǵylymı qoǵamdastyq aldynda alǵash ret eýrazııalyq ıntegratsııa ıdeıasyn aıtty. Ol Eýrazııalyq odaqqa birigýdiń mańyzdy qajettiligin málimdep, dostastyqtyń zııatkerlik elıtasyn jan-jaqty ıntegratsııaǵa jańa serpin berýge shaqyrdy», - dep atap ótti ol.
Onyń atap ótýinshe, Nursultan Nazarbaevtyń mundaı ıdeıasy osydan keıin-aq iskerlik ortada jáne qoǵamdyq-gýmanıtarlyq deńgeıde talqylana bastady. Eýrazııalyq ıntegratsııany qamtıtyn kóptegen birlesken alańdar paıda bolyp, tabysty jumys isteı bastady. Olardyń qatarynda Eýrazııa damý banki, Eýrazııa iskerlik keńesi, Eýrazııalyq medıa forým, Eýrazııalyq ýnıversıtetter qaýymdastyǵy syndy birlestikter bar.
«Biz barlyq ýaqytta da Eýrazııalyq ekonomıkalyq odaqqa joldyń ońaı bolmaǵandyǵyn jáne onyń Nursultan Nazarbaevtyń janqııarlyq eńbeginiń arqasynda eńserilgendigin este ustaýǵa tıispiz. Qazaqstannyń Tuńǵysh Prezıdenti barlyq ýaqytta da ashyq dıalogty jaqtaýshy boldy, bitimgershilik saıasatty júrgizdi. Jaýlasýshy taraptardy tatýlastyrýǵa umtyldy jáne bul máselede óziniń kóregendiginiń arqasynda tabysqa jetip otyrdy», - dedi Á.Rahymjanov.
